ދިވެހިރާއްޖެއަށް ކުރިމަތިވެފައިވާ މާލީ ދަތިކަމުން އަރައިގަތުމަށް އެހީތެރިވުމަށް އިންޑިއާ ސަރުކާރުން ތައްޔާރަށް ހުރިކަމަށް އެ ޤައުމުގެ މީޑިއާތަކުން ރިޕޯޓުކޮށްފިއެވެ. މި ޚަބަރު ފެތުރިފައިވަނީ ރާއްޖެއިން 2024 ވަނަ އަހަރުގެ އޭޕްރީލް މަހުގައި 250 މިލިއަން ޑޮލަރުގެ ސުކޫކް ބޮންޑެއް ދައްކަންޖެހޭ ދަނޑިވަޅެއްގައެވެ.

އިންޑިއާގެ ރިޕޯޓެއްގައި ފާހަގަކޮށްފައިވާ ގޮތުގައި، ދިވެހިރާއްޖެއަށް ކުރިމަތިވެފައިވާ އިޤްތިޞާދީ ގޮންޖެހުންތަކާ ގުޅިގެން، އިންޑިއާ ސަރުކާރުން ދަނީ ވަރަށް ސަމާލުކަމާއެކު މި މައްސަލަ ދިރާސާކުރަމުންނެވެ. އަދި ދިވެހިރާއްޖެއަށް އެހީތެރިވުމަށް އިންޑިއާ ސަރުކާރުން ތައްޔާރަށް ތިބިކަމަށް އެ ޤައުމުގެ އިސް އޮފިޝަލަކު ވިދާޅުވެފައިވާކަމަށް ރިޕޯޓުގައި ބަޔާން ކޮށްފައިވެއެވެ.

"ދިވެހިރާއްޖެއަކީ އަޅުގަނޑުމެންގެ ވަރަށް ގާތް އަވަށްޓެރިއެއް. އަޅުގަނޑުމެން އެ ޤައުމަށް އެހީތެރިވާނަން،" އިންޑިއާ ސަރުކާރުގެ އިސް އޮފިޝަލަކު ވިދާޅުވެފައިވާ ކަމަށް ރިޕޯޓުގައި ފާހަގަ ކޮށްފައިވެއެވެ.

ދިވެހިރާއްޖޭގެ އިޤްތިޞާދީ ޙާލަތު ރަނގަޅުކުރުމަށްޓަކައި އިންޑިއާއިން ކުރިން ވެސް ވަނީ އެކި ގޮތްގޮތުން އެހީތެރިކަން ފޯރުކޮށްދީފައެވެ. މީގެ ތެރޭގައި 2022 ވަނަ އަހަރު ދެއްވި 100 މިލިއަން ޑޮލަރުގެ ބަޖެޓް ސަޕޯޓް ލޯނާއި، 2023 ވަނަ އަހަރު ދެއްވި 200 މިލިއަން ޑޮލަރުގެ ލައިން އޮފް ކްރެޑިޓް ހިމެނެއެވެ.

ރިޕޯޓުތަކުގައި ފާހަގަ ކޮށްފައިވާ ގޮތުގައި އިންޑިއާގެ މިނިސްޓްރީ އޮފް އެކްސްޓާނަލް އެފެއާޒްއިން މިކަމާ ގުޅޭގޮތުން އެއްވެސް ރަސްމީ ބަޔާނެއް އަދި ނެރެފައެއް ނުވެއެވެ. އަދި އިންޑިއާގެ ރިޒާވް ބޭންކާއި، ދިވެހި ސަރުކާރާއި މޯލްޑިވްސް މަނިޓަރީ އޮތޯރިޓީގެ ބަހެއް ހޯދުމަށް ފޮނުވި އީމެއިލްތަކަށް ވެސް ޖަވާބެއް ލިބިފައެއް ނުވާ ކަމަށް އިންޑިއާގެ މީޑިއާތަކުން ވަނީ ރިޕޯޓްކޮށްފައެވެ.

ތަފާސް ހިސާބުތަކުން ދައްކާ ގޮތުގައި، އޮކްޓޯބަރު މަހު ދިވެހިރާއްޖެއިން ދައްކަންޖެހޭ ގާތްގަނޑަކަށް 500 މިލިއަން ޑޮލަރުގެ ސުކޫކް ދަރަނީގެ ތެރެއިން 25 މިލިއަން ޑޮލަރު ދައްކަން ޖެހެއެވެ. މި ދަނޑިވަޅުގައި، މޯލްޑިވްސް މަނިޓަރީ އޮތޯރިޓީން މިދިޔަ މަހުގެ ފަހުކޮޅު ނެރުނު ބަޔާނެއްގައި ބުނެފައިވަނީ އިންޑިއާއާއެކު 400 މިލިއަން ޑޮލަރުގެ ކަރަންސީ ސްވޮޕް އެރޭންޖްމަންޓެއްގެ އެއްބަސްވުމެއްގައި ސޮއިކުރުމުގެ މަސައްކަތް ކުރަމުން އަންނަ ކަމަށެވެ.

އެމްއެމްއޭއިން ދީފައިވާ މަޢުލޫމާތުގެ މައްޗަށް ބިނާކޮށް، ރާއްޖޭގެ ޖުމްލަ ރިޒާވް އަދި ބޭނުންކުރެވޭ ރިޒާވް އިތުރު ވެފައިވާ ކަމަށް ބުނެފައި ވެއެވެ. އަދި 2024 ވަނަ އަހަރުގެ ނިޔަލަށް ރާއްޖޭގެ ރަސްމީ ރިޒާވް 606 މިލިއަން ޑޮލަރަށްވުރެ އިތުރުވާނެކަމަށް އެމްއެމްއޭއިން އަންދާޒާ ކޮށްފައިވެއެވެ.