ސަރުކާރުން ހުޅުވާލި އައު ފުރުސަތާއެކު މިއަހަރު އޭލެވެލްގެ ކިޔެވުން ފެށޭއިރު ސަރުކާރު ސްކޫލްތަކުގައި އަލަށް 2000 ކުދިން ތަޢުލީމު ޙާސިލުކުރަމުންދާނެކަމަށް ތަޢުލީމާބެހޭ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.
މިއީ ފާއިތުވި އަހަރާ އަޅާބަލާއިރު 77 އިންސައްތައިގެ އިތުރުވުމެކެވެ.
ރައީސުލްޖުމްހޫރިއްޔާގެ އިރުޝާދުގެ ދަށުން އޭލެވެލް ދަރިވަރުންގެ އަދަދު އިތުރުކުރުމަށް ސަރުކާރުން ވަނީ ޚާއްޞަ މަސައްކަތްތަކެއް ފަށާފައެވެ. މިގޮތުން މަތީ ސާނަވީއަށް ވަނުމުގެ ޝަރުތުތަކަށް ލުއިގެނެސް، 3 ނުވަތަ 2 މާއްދާއިން ފާސްވާ ދަރިވަރުންނަށްވެސް އޭލެވެލް ކިޔެވުމުގެ ފުރުޞަތު ވަނީ ހުޅުވާލާފައެވެ.
Advertisement
"2013 ވަނަ އަހަރު އޯލެވެލް އިމްތިޙާނުގައިވެސް 5 މާއްދާއިން ފާސްވާ ދަރިވަރުންގެ ނިސްބަތް ހުރީ 50 އިންސައްތައިގައި. އޭގެ 10 އަހަރު ފަހުން 2023 ހުގައިވެސް މިނިސްބަތް ހުރީ 50 އިންސައްތައިގައި. އޭގެ ސަބަބުން ބައެއް ކުދިން މަގުމަތިވުމުގެ ފުރުސަތު މިއޮތީ. ދެން މިކުދިން ފައުންޑޭޝަން ކޯހެއް މިހަދަނީ. އެމްއެންޔޫގެ ތަފާސްހިސާބުތަކުން ދައްކާގޮތުންވެސް ފައުންޑޭޝަންގައި ބައިވެރިވާ 80 އިންސައްތަ ކުދިން ކޯސް ދޫކޮށްލާ." ވަޒީރު ވިދާޅުވިއެވެ.
މިނިސްޓަރ ޝަފީޢު ވިދާޅުވިގޮތުގައި މުޅި ރާއްޖޭގެ 23 ސަރުކާރު ސްކޫލެއްގައި އޭލެވެލް ކިޔެވުމުގެ ފުރުޞަތު ވަނީ ހުޅުވާލާފައެވެ. "މި ބަދަލުތަކާއެކު ގިނަ ދަރިވަރުންނަށް މަތީ ތަޢުލީމު ހާސިލުކުރުމުގެ ފުރުޞަތު ލިބި، އެކުދިންގެ ދިރިއުޅުމަށް ހެޔޮ ބަދަލުތަކެއް އަންނާނެކަމަށް އަޅުގަނޑުމެން ގަބޫލުކުރަން." މިނިސްޓަރ ވިދާޅުވިއެވެ.
މި އައު ސިޔާސަތުގެ ދަށުން ގިނަ ދަރިވަރުންނަށް މަތީ ތަޢުލީމުގެ ދޮރު ހުޅުވިގެންދާއިރު، ކުރިއަށް އޮތް އަހަރުތަކުގައި މިއަދަދު އިތުރަށް އިތުރުވެގެންދާނެކަމަށް ސަރުކާރުން އުންމީދުކުރެއެވެ. މިކަމުގެ ސަބަބުން ޤައުމުގެ ތަރައްޤީއަށް ބޭނުންވާ ހުނަރުވެރި މަސައްކަތްތެރިން އުފެއްދުމަށް މަގުފަހިވެގެންދާނެކަމަށްވެސް ސަރުކާރުން ބުނެފައިވެއެވެ.
