މާލެއާއި ހުޅުމާލޭގައި ބިދޭސީން ދިރިއުޅޭ ޤަވާއިދާ ޚިލާފު ތަންތަނަށް އަމާޒުކޮށް ބޮޑު އޮޕަރޭޝަނެއް ފަށައިފިއެވެ.
މި އޮޕަރޭޝަންގައި މިހާތަނަށް 18 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންދެވިފައި ކަމަށް އެ އިދާރާއިން ބުނެފައިވެއެވެ.
ރައީސުލްޖުމްހޫރިއްޔާގެ އިރުޝާދުގެ ދަށުން ކުރިއަށްދާ މި އޮޕަރޭޝަންގައި ގިނަ ސަރުކާރު އިދާރާތަކެއް ބައިވެރިވެއެވެ. މި އޮޕަރޭޝަންގެ ދަށުން މިހާތަނަށް 8 އެކޮމޮޑޭޝަން ބްލޮކް ވަނީ ބަލައި ފާސްކޮށްފައެވެ.
Advertisement
އިމިގްރޭޝަނުން ބުނީ، ރާއްޖެއަށް ބިދޭސީން އެތެރެކުރާ ބައެއް ފަރާތްތަކުން، އެ ބިދޭސީންގެ ދިރިއުޅުމުގެ އިންތިޒާމު ހަމަޖެއްސުމަކާ ނުލައި އެމީހުން ދޫކޮށްލާކަން ފާހަގަކުރެވިފައިވާކަމަށެވެ.
މީގެ އިތުރުން، މިފަދަ ބިދޭސީންނަށް އަމާޒުކޮށްގެން ހިންގޭ އެކޮމޮޑޭޝަންތަކެއް ހުރިކަން އޮޕަރޭޝަންތަކުން ދައްކައިދޭކަމަށް އިމިގްރޭޝަނުން ބުންޏެވެ. އަދި، މި އެކޮމޮޑޭޝަންތައް ޢާންމުކޮށް ހިންގަނީ މާލޭގައި ހުންނަ ބާވެފައިވާ ޢިމާރާތްތައް ބޭނުންކޮށްގެން، އެ ތަންތަން ބިދޭސީންނަށް ކުއްޔަށް ދޫކޮށްގެން ކަމަށްވެސް އިމިގްރޭޝަނުން ބުންޏެވެ.
އިމިގްރޭޝަނުން އިތުރަށް ބުނި ގޮތުގައި، މިފަދަ އެކޮމޮޑޭޝަންތައް ހުންނަނީ ޢާންމު ސަލާމަތާއި ރައްކާތެރިކަމަށް ނުރައްކާވާ ފަދަ ގޮތަކަށެވެ. ޚާއްޞަކޮށް، އަލިފާނުގެ ހާދިސާއެއް ހިނގައިފިނަމަ، އޭގެ ނޭދެވޭ އަސަރު ވަށައިގެންވާ އެންމެހައި ޢިމާރާތްތަކަށް ފޯރާނެ ފަދަ ގޮތަކަށް މި ތަންތަން ބައްޓަންކުރެވިފައި ހުރިކަން އެ އިދާރާއިން ކަންބޮޑުވުމާއެކު ފާހަގަކޮށްފައިވެއެވެ.
މި އޮޕަރޭޝަން ކުރިއަށްދާނީ ކިހާ ދުވަހަކަށްކަން އަދި ސާފުވެފައި ނުވިނަމަވެސް، މާލެއާއި ހުޅުމާލޭގައި ބޮޑެތި ރެއިޑުތައް ކުރިއަށްދާނެކަމަށާއި މި އޮޕަރޭޝަންގެ މަޤްޞަދަކީ ޤަވާއިދާ ޚިލާފަށް އުޅޭ ބިދޭސީން ހޯދައި، އެފަދަ މީހުން ދިރިއުޅޭ ނުރައްކާތެރި ތަންތަން ބަންދުކުރުންކަމަށް އިމިގްރޭޝަން އިން ބުންޏެވެ.
