މޯލްޑިވްސް ލޭންޑް އެންޑް ސަރވޭ އޮތޯރިޓީ އުވާލުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

މި ނިންމެވުން ނިންމަވާފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުންނެވެ.

ރައީސުލްޖުމްހޫރިއްޔާގެ އޮފީހުން ނެރުއްވި ދެންނެވުމެއްގައި ބަޔާންކުރައްވާފައިވާ ގޮތުގައި، މި އޮތޯރިޓީ އުވާލެއްވުމަށްފަހު، އެ އޮތޯރިޓީން ކުރަމުން އައި މަސައްކަތްތައް ކުރިއަށް ގެންދާނީ ގެދޮރުވޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއިންނެވެ. މިގޮތަށް ހަމަޖެއްސެވުމުގެ މަޤްޞަދަކީ މި މަސައްކަތްތައް މިހާރަށްވުރެ ހަރުދަނާ ގޮތެއްގައި އަދި ޚަރަދު ކުޑަ ގޮތެއްގައި ކުރިއަށް ގެންދިއުމެވެ.

މޯލްޑިވްސް ލޭންޑް އެންޑް ސަރވޭ އޮތޯރިޓީއަކީ ގެދޮރުވެރިކަމާބެހޭ ވުޒާރާގެ ދަށުން ހިންގަމުން އައި ތަނެކެވެ. މި އޮތޯރިޓީ އުފައްދާފައިވަނީ ރާއްޖޭގެ ބިމާއި ކަނޑުފަޅުތަކާއި އަދި ފަރުތަކުގެ ދިރާސާތައް ކުރުމުގެ ބޭނުމުގައެވެ.

މި އޮތޯރިޓީ އުވާލެއްވުމާއެކު، ރާއްޖޭގެ ބިމުގެ ބޭނުން ކުރުމާއި ތަރައްޤީ ކުރުމުގެ މަސައްކަތްތައް ކުރިއަށް ގެންދާނީ ރާއްޖޭގެ ބިނާވެށި ޕްލޭން ކުރުމާއި ހިންގުމުގެ ޤާނޫނުގެ ދަށުންނެވެ. މި ޤާނޫނުގެ ދަށުން ބިން ތަރައްޤީކުރުމުގެ ހުއްދަ ދެވޭނެ އިދާރާތަކުގެ ތެރޭގައި ގެދޮރުވެރިކަމާއި ބިމާއި ޢުމްރާނީ ތަރައްޤީއާއި ބެހޭ ވުޒާރާ، ސިޓީ ކައުންސިލްތައް، އަދި ރަށު ކައުންސިލްތައް ހިމެނެއެވެ.

ރައީސްގެ ރިޔާސީ ވައުދުފުޅުތަކުގެ ތެރޭގައި ބިމުގެ ބޭނުން އެންމެ އެދެވޭގޮތުގައި ހިފައި، ރާއްޖޭގެ އިޤްތިޞާދަށް އޭގެ މަންފާ އެންމެ ފުރިހަމަ ގޮތުގައި ލިބިދިނުމުގެ ގޮތުން ބިނާވެށީގެ މަސައްކަތް ހަރުދަނާކުރުން ހިމެނެއެވެ.