ހުޅުމާލޭ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްޤީކުރަމުންދާ "އަމާން އުދަރެސް" ގެ ހުރިހާ ޓަވަރެއްގެ ސްޓްރަކްޗަރގެ މަސައްކަތް ނިމިއްޖެއެވެ.

މި މަޝްރޫޢުގެ ދަށުން އިމާރާތްކުރަމުންދާ 16 ޓަވަރުގެ އެންމެ ފަހު ސްލެބް އަޅައި ނިމިފައިވާކަމަށް އެފްޑީސީން މިއަދު ވަނީ ބުނެފައެވެ.

މި މަޝްރޫޢުގެ މަސައްކަތް ކުރަމުންދަނީ އިންޑިއާގެ ކުންފުންޏެއް ކަމަށްވާ ކަލްޕަތާރޫ ޕްރޮޖެކްޓްސް އިންޓަރނޭޝަނަލް ލިމިޓެޑް (ކޭޕީއައިއެލް) އިންނެވެ. އެފްޑީސީގެ ޑިރެކްޓަރ ޙަސަން މާނިޙް އުމަރު ވިދާޅުވި ގޮތުގައި، ދެން ކުރިއަށްދާނީ ފިނިޝިންގ މަސައްކަތްތަކެވެ. އަދި މަސައްކަތް ބާރު ދުވެއްޔެއްގައި ކުރިއަށް ގެންގޮސް، ހުރިހާ ޔުނިޓެއް ކަނޑައެޅިފައިވާ މުއްދަތަށް ނިންމައި ހަވާލުކުރެވޭނެ ކަމަށް އޭނާ ވިދާޅުވިއެވެ.

އެފްޑީސީގެ މެނޭޖަރ ޕްރޮޖެކްޓްސް އިންޖިނިއަރިންގ، މުޙައްމަދު ހައިކަލް އިބްރާހިމް ވިދާޅުވި ގޮތުގައި، މި 16 ޓަވަރުގެ ސްޓްރަކްޗަރ އަވަހަށް ނިމުމުގެ މައިގަނޑު ސަބަބަކީ އެލުމިނިއަމް ފްރޭމްވޯކް ކޮންސްޓްރަކްޝަން މެތަޑް ބޭނުންކޮށްފައިވާތީއެވެ.

ކޭޕީއައިއެލްގެ ޕްރޮޖެކްޓް ޑިރެކްޓަރ ތަންގަރާޖް ކަރްތިކެޔަން ވިދާޅުވި ގޮތުގައި، މި ހުރިހާ ޓަވަރެއްވެސް ކަނޑައެޅިފައިވާ މުއްދަތަށް ނިންމާފައިވަނީ ކޮލިޓީއަށް އުނިކަމެއް ނާންނާނެ ގޮތަށެވެ.

ސަރުކާރުގެ "ގެދޮރުވެރިކަން" މަޝްރޫޢުގެ ދަށުން ހުޅުމާލޭގެ ދެވަނަ ފިޔަވަހީގައި އެފްޑީސީން އިމާރާތްކުރަމުންދަނީ ޖުމްލަ 4000 ހައުސިންގ ޔުނިޓްގެ 32 ޓަވަރެވެ. މީގެ ތެރެއިން 16 ޓަވަރު ތަރައްޤީކުރަމުންދަނީ ކޭޕީއައިއެލްއިން ކަމަށްވާއިރު، އަނެއް 16 ޓަވަރު ތަރައްޤީކުރަމުންދަނީ އިންޑިއާގެ އެހެން ކުންފުންޏެއް ކަމަށްވާ އެންބީސީސީއިންނެވެ. މި 4000 ހައުސިންގ ޔުނިޓްގެ މަސައްކަތް އެއްކޮށް ނިމޭނެ ކަމަށް އެފްޑީސީން ލަފާކުރަނީ 2025 ވަނަ އަހަރުގެ ފުރަތަމަ އަދި ދެވަނަ ކުއާޓަރގައެވެ.