މަސްވެރިންގެ ދަފްތަރުގައި މިހާތަނަށް 200 އުޅަނދު ރަޖިސްޓްރީ ކޮށްފައިވާކަމަށް ކަނޑުގެ ވަސީލަތްތަކާބެހޭ ވުޒާރާއިން މިއަދު ހާމަކޮށްފިއެވެ.

މި ދަފްތަރު ފުޅާކުރުމުގެ މަސައްކަތް ކުރިއަށްދަނީ ޒޯނުތަކަކަށް ބަހާލައިގެން ކަމަށްވެސް އެ ވުޒާރާއިން ވަނީ ބުނެފައެވެ.

މަސްވެރިންގެ ދަފްތަރު ފުޅާކުރުމަށްޓަކައި ކައުންސިލްތަކާއެކު މަޝްވަރާކޮށްފައިވާކަމަށް ވުޒާރާއިން ބުންޏެވެ. މި މަޝްވަރާގައި ބައިވެރިވެވަޑައިގަތީ މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަޙްމަދު ޝިޔާމް އާއި ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރު އަދި އެ ދެވުޒާރާގެ އިސް ބޭފުޅުންނެވެ.

މި މަޝްވަރާގައި ދެ ވުޒާރާ ގުޅިގެން ޚާއްޞަ ޓީމެއް އެކުލަވާލުމަށް ނިންމާފައިވާކަމަށް ވުޒާރާއިން ހާމަކުރިއެވެ. އަދި މަސްވެރިކަމަކީ ޕްރޮފެޝަނަލް މަސައްކަތެއްގެ ގޮތުގައި ކަނޑައެޅުމަށް މަސައްކަތްކުރަމުންދާ ކަމަށްވެސް ބުންޏެވެ.

މަސްވެރިންނަށް ލިބެންޖެހޭ އަސާސީ ޚިދުމަތްތައް އެންމެ އެކަށީގެންވާ ގޮތުގައި ފޯރުކޮށްދިނުމަކީ ރައީސުލްޖުމްހޫރިއްޔާގެ ރިޔާސީ ވަޢުދުފުޅުތަކުގެ ތެރެއިން އެއް ވަޢުދެވެ. މި މަޤްޞަދު ޙާޞިލުކުރުމަށްޓަކައި، މަސްވެރިންގެ ޤައުމީ ދަފްތަރެއް އެކުލަވާލުމަކީ އެންމެ އިސްކަންދޭ އަދި މުހިންމު އެއް މަޝްރޫޢު ކަމުގައި ފާހަގަކުރެވެއެވެ. މި ދަފްތަރު އެކުލަވާލުމުގެ މައިގަނޑު މަޤްޞަދަކީ، މަސްވެރިކަމަކީ ޕްރޮފެޝަނަލް މަސައްކަތެއްގެ ގޮތުގައި ކަނޑައަޅައި، މަސްވެރިންނަކީވެސް އެހެނިހެން ދާއިރާތަކުގައި މަސައްކަތްކުރާ ފަރާތްތަކެކޭ އެއްފަދައިން، ދައުލަތުން ޤަބޫލުކުރާ އާމްދަނީ ލިބޭ މަސައްކަތެއް ކުރާ ބައެއްގެ ގޮތުގައި ރަސްމީކޮށް ކަނޑައެޅުމެވެ.