ޤައުމުގެ ހާލަތު ބަދަލުކޮށް، ދަރަނި އަރަންޏަށް ހެދުމަށް ޒުވާނުންގެ އެހީތެރިކަން ބޭނުންވާކަމަށް އިޤްތިޞާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.
ވަޒީރު މިހެން ވިދާޅުވީ މިއަދު ވިލާ ކޮލެޖްގައި ބޭއްވުނު ރަސްމިއްޔާތެއްގައި ވާހަކަފުޅު ދައްކަވަމުނެވެ.
ވިލާ ކޮލެޖްގެ ފެކަލްޓީ އޮފް ބިޒްނަސް މެނޭޖްމަންޓް "ޤާސިމް އިބްރާހީމް ސްކޫލް އޮފް ބިޒްނަސް" އަށް ބަދަލުކޮށް، އަދި އިންކިއުބޭޝަން ސެންޓަރެއް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، ޤައުމުގެ ހާލަތު ބަދަލުކުރުމަށް ޒުވާނުން ސަރުކާރާއެކު މަސައްކަތްކުރުން މުހިންމު ކަމަށެވެ.
"މިއަދު އަޅުގަނޑުމެން މިތިބީ ވަރަށް ބޮޑު ދަރަންޏެއްގައި. ސަރުކާރު ވެރިކަމާ ހަވާލުވިއިރު ދަރަނި 122 ބިލިއަން ރުފިޔާގައި ހުރި. މި ދަރަނި އަރަންޏަށް ހެދުމަށް އަޅުގަނޑުމެންނަށް ޒުވާނުންގެ އެހީތެރިކަން ބޭނުންވޭ،" ވަޒީރު ވިދާޅުވިއެވެ.
ވަޒީރު އިތުރަށް ވިދާޅުވީ، ރާއްޖޭގެ އިޤްތިޞާދު ސިންދަފާތުކުރުމަށް ސަރުކާރުން މަސައްކަތްކުރަމުންދާ ކަމަށެވެ. އަދި މި މަސައްކަތުގައި ޒުވާނުންގެ ދައުރު މުހިންމުކަމަށް ވިދާޅުވެ، ޤައުމު ބިނާކުރުމުގައި ޒުވާނުން ބައިވެރިވުމަށް ގޮވާލެއްވިއެވެ.
މި ރަސްމިއްޔާތުގައި ވިލާ ކޮލެޖުން ވަނީ އިންކިއުބޭޝަން ސެންޓަރެއް ހުޅުވައި، ދަރިވަރުންގަރުންގެ ވިޔަފާރި ޚިޔާލުތަކަށް އެހީތެރިކަން ފޯރުކޮށްދޭން ފަށާފައެވެ. މި ސެންޓަރުން ދަރިވަރުންނަށް އެމީހުންގެ ވިޔަފާރި ޚިޔާލުތައް ތަރައްޤީކޮށް، ވިޔަފާރި ފެށުމަށް ބޭނުންވާ އެހީތެރިކަން ފޯރުކޮށްދޭނެއެވެ.
ވިލާ ކޮލެޖްގެ ފެކަލްޓީ އޮފް ބިޒްނަސް މެނޭޖްމަންޓް "ޤާސިމް އިބްރާހީމް ސްކޫލް އޮފް ބިޒްނަސް" އަށް ބަދަލުކުރުމާއެކު، ކޮލެޖުން ވަނީ ވިޔަފާރީގެ ދާއިރާއިން ދަރިވަރުންނަށް ފޯރުކޮށްދޭ ތަޢުލީމު އިތުރަށް ފުޅާކުރުމަށް މަގުފަހިކޮށްދީފައެވެ.
