ފަލަސްޠީނުގެ ރައްޔިތުންނަށް ދިވެހިންގެ ފަރާތުން ހަދިޔާ ކުރާ 7800 މަސްދަޅުކޭސް މި މަހު 15 ގައި ފޮނުވުމަށް ތައްޔާރުވެފައިވާކަމަށް ރައީސުލްޖުމްހޫރިއްޔާގެ އޮފީހުގެ ސްޕޯކްސްޕާސަން ހީނާ ވަލީދު ވިދާޅުވެއްޖެއެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި މަޢުލޫމާތު ދެއްވަމުން ހީނާ ވިދާޅުވީ ފަލަސްޠީނުގެ ރައްޔިތުންނަށްޓަކާ މަސްދަޅު ކޭސްތަކެއް ހަދިޔާކުރުމަށް ނިންމާފައިވާ ކަމަށާއި، އޭގެ ފުރަތަމަ ޝިޕްމަންޓް މި މަހުގެ 15 ވަނަ ދުވަހު ފުރުވާލުމަށް ތައްޔާރުވެފައިވާ ކަމަށެވެ. މި ޝިޕްމެންޓުގައި 7800 މަސްދަޅު ކޭސް ފަލަސްޠީނަށް ފޮނުވުމަށް ހަމަޖެހިފައިވާ ކަމަށް ހީނާ ވިދާޅުވިއެވެ.
ހީނާ ވިދާޅުވީ މި މަސްދަޅު ކޭސްތައް ފަލަސްޠީނަށް ލިބޭނެ ކަމަށް ލަފާކުރެވެނީ 40 ވަރަކަށް ދުވަސް ފަހުން ކަމަށާއި ޝިޕްމަންޓް އެންމެ ފުރަތަމަ ޙަވާލުކުރެވޭނީ އިޖިޕްޓުގެ ރެޑް ކްރެސެންޓާ ކަމަށެވެ. އެޔަށްފަހު އެ ޖަމިއްޔާއިން ފަލަސްޠީނުގެ ރެޑް ކްރެސެންޓާ ޙަވާލުކުރާނެ ކަމަށް ހީނާ ވިދާޅުވިއެވެ.
Advertisement
ހީނާ ވިދާޅުވީ ފަލަސްޠީނަށްޓަކާ ފައިސާގެ އެހީ ހޯދުމަށް ކުރިއަށް ގެންދިޔަ ޓެލެތޯން އިން ލިބުނު 19 މިލިއަނަށް ވުރެ ގިނަ ރުފިޔާ ޔޫއެންއާރްޑަބްލިޔުއޭގެ އެކައުންޓަށް ޖަމާކޮށްފައިވާ ކަމަށެވެ.
މީގެ އިތުރުން ޗުއްޓީއަށްފަހު ރައްޔިތުންގެ މަޖިލިސް ހުޅުވުމާއެކު އިސްރާއީލްގެ ޕާސްޕޯޓު ރާއްޖޭގައި މަނާކުރުމުގެ މައްސަލަ ސަރުކާރުން މަޖިލީހަށް ވައްދާނެ ކަމަށް ވެސް ހީނާ ވަނީ މިއަދު ވިދާޅުވެފައެވެ.
