ކުޅިވަރު ތަރައްގީ ކުރުމުގެ ތެރެއިން ރާއްޖޭގެ ކުޅިވަރު މުޅީން އެހެން ހަރުފަތަކަށް ގެންދިޔުމަށްޓަކައި ކުރަމުންގެންދާ މަސައްކަތުގެ ތެރެއިން ، ރާއްޖޭގެ އެކި ކަންކޮޅުތަކުން ވޮލީ ކޯޗުން މިމަހު ޗައިނާއަށް ތަމްރީނަށް ފޮނުވާނެ ކަމަށް ސަރުކާރުން ބުނެފިއެވެ.

އަންގާރަ ދުވަހު ރައީސް އޮފީހުގައި ކުރިޔަށްދިޔަ ނޫސްވެރިންގެ ބައްދަލުވުމުގައި ކުޅިވަރާއިބެހޭ މިނިސްޓްރީން ބުނީ ރާއްޖެއިން ފުރާ ވޮލީ ކޯޗުން ތަމްރީނު ކުރުމުގެ ޕްރޮގްރާމަކީ ސީދާ ޗައިނާއިން ލިބިދޭ ހިލޭ އެހީއެއްގެ ދަށުން ކުރިޔަށްދާ ޕްރޮގްރާމެކެވެ.

މީގެ އިތުރުން ކުޅިވަރު ތަރައްގީ ކުރުމުގައި ސަރަހައްދީ ގައުމުތަކާއެކު އެމްއޯޔޫ ތަކުގައި ސޮއިކުރުމުގެ މަސައްކަތް ކުރިޔަށްދާ ކަމަށާއި، މިމަސްތެރޭގައި ސައޫދީއަރަބިއްޔާއާއެކު އެމްއޯޔޫއެއްގައި ސޮއިކުރަން ހަމަޖެހިފައިވާ ކަމަށްވެސް މިނިސްޓްރީން ބުންޏެވެ. ހަމައެހެންމެ މެލޭޝިއާ އާއި ޔޫއޭއީއާއެކު ވެސް ރާއްޖޭގެ ކުޅިވަރު ތަރައްގީ ކުރުމަށްޓަކައި އެމްއޯޔޫތަކުގައި ސޮއި ކުރުމުގެ މަސައްކަތް ކުރަމުންދާ ކަމަށް ކުޅިވަރާއިބެހޭ މިިނިސްޓްރީން ބުންޏެވެ.

ފާހަގަކޮށްލަންޖެހޭ ކަމަކީ ރާއްޖޭގެ ގައުމީ ވޮލީ އަކީ ސަރަހައްދީ ފެންވަރުގައި އެހާ ރަނގަޅު ނަތީޖާއެއް ނެރެވޭ ޓީމެއް ނޫނެވެ. ވޮލީ ކޯޗުން ބުނަނީ މިކަމުގެ އަސްލު މައްސަލައަކީ ވޮލީއަށް ލިބޭ ފުރުސަތުތައް މަދުކަމެވެ. އޭގެތެރޭގައި ވަސީލަތްތައް މަދުކަން ވެސް ފާހަގަ ކުރެއެވެ.