ހދ. ހިރިމަރަދޫ ރައްޔިތުން ކ. ތުލުސްދޫއަށް ބަދަލުކޮށްދިނުމަށް އެ ރަށު ކައުންސިލުން ލޯކަލް ގަވަރމަންޓް މިނިސްޓްރީގައި މިއަދި އެދިއްޖެއެވެ.
ލޯކަލް ގަވަރނަންސް މިނިސްޓަރ އާދަމް ޝަރީފް ޢުމަރު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ހދ. ހިރިމަރަދޫ ރައްޔިތުން އެހެން ރަށަކަށް ބަދަލުވުމަށް ނިންމާފައިވާކަމަށް މިއަދުގެ ބައްދަލުވުމުގައި އެ ރަށު ކައުންސިލްގެ މެމްބަރުން ވިދާޅުވިކަމަށެވެ. އަދި ރައްޔިތުން ބޭނުންވަނީ ކ. ތުލުސްދޫއަށް ބަދަލުވާންކަން ކައުންސިލުން ފާހަގަކުރެއްވި ކަމަށް މިނިސްޓަރ ވިދާޅުވިއެވެ.
ހިރިމަރަދޫ ކައުންސިލުން ލޯކަލް ގަވަރނަންސް މިނިސްޓްރީއާ މިއަދު ބައްދަލުކޮށް މިކަމުގެ މަޝްވަރާތައް ވަނީ ކޮށްފައެވެ. އެގޮތުން ހިރިމަރަދޫ ކައުންސިލްގެ ރައީސް މުޙައްމަދު ވަހީދު ވިދާޅުވީ ހިރިމަރަދޫ ރައްޔިތުން ބޭނުންވަނީ މާލެ ސަރަޙައްދުގެ ރަށަކަށް ހިޖުރަ ކުރަން ކަމަށާއި ތުލުސްދޫ ޚިޔާރުކޮށްފައިވަނީ އެ ރަށަށް ހިޖުރަކުރެވޭ ވަރަށް ބިން އޮތުމުން ކަމަށެވެ.
Advertisement
ވަހީދު ވިދާޅުވީ ހިރިމަރަދޫ ރައްޔިތުންގެ ފަރާތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް މިކަން ދަންނަވާފައިވާ ކަމަށާއި އެރަށުގެ ރައްޔިތުން ބޭނުންވާ ގޮތަށް ތުލުސްދޫއަށް ހިޖުރަ ކުރެވޭނެ ކަމުގެ ޔަޤީންކަން އެމަނިކުފާނު ދެއްވާފައިވާ ކަމަށެވެ. އެގޮތުން އެމަނިކުފާނު ދަންނަވައިގެން އެކަން ތަންފީޛުކުރުމަށް މިހާރު އޮތީ ހައުސިންގ މިނިސްޓްރީއާ ޙަވާލުކޮށްފައި ކަމަށް ވަހީދު ވިދާޅުވިއެވެ.
