ދިވެހިރާއްޖޭގެ އެގްރިކަލްޗަރ އިކޮނޮމިކް ޒޯންގެ ދެވަނަ ފިޔަވަހީގެ ދަށުން ބިސް އުފެއްދުމަށް ޚާއްސަ ޕޯލްޓްރީ ފާމެއް އުތުރު ތިލަފަލުގައި ތަރައްގީ ކުރުމުގެ ޕްލޭންތައް ސަރުކާރުން އިއުލާންކޮށްފިއެވެ.

ދައުލަތުގެ މީޑިއާއިން ރޭ ގެނެސްދެއްވި ލައިވް ޕްރޮގްރާމެއްގައި ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ.ޢައިޝަތު ރަމީލާ ވިދާޅުވީ، މި މަޝްރޫޢު ހިންގާނީ އުތުރު ތިލަފަޅުގައެވެ. އެގޮތުން 200 ހެކްޓަރުގެ ބިމުގައި މިނިސްޓްރީން ހިންގާ މަސައްކަތުގެ ތެރެއިން ދެވަނަ ފިޔަވަހީގައި ކުކުޅު އާލާކޮށް މުޅި ރާއްޖޭގެ އެންމެނަށް ބޭނުންވާ ވަރަށް ކުކުޅު ބިސް އުފެއްދުމަށް މިނިސްޓްރީން ވަނީ ޕްލޭން ކޮށްފައެވެ. 

މިނިސްޓަރު ވިދާޅުވީ އަމާޒަކީ މުޅި ރާއްޖެއަށް ބޭނުންވާ ވަރަށް ބިސް އުފައްދައި ބިސް އިމްޕޯޓްކުރުން ނިމުމަކަށް ގެނައުމެވެ.

މިނިސްޓަރ ވިދާޅުވީ ، މަޤްޞަދަކީ ކާބޯތަކެތީގެ ރައްކާތެރިކަން ކަށަވަރުކޮށް ޑޮމެސްޓިކް ބިސް އުފެއްދުން ތަރައްގީކުރުމެވެ. ޕޯލްޓްރީ ފާމްގެ ސަބަބުން ލޯކަލް ޑިމާންޑް ފުއްދައިދީ އިމްޕޯޓަށް ބަރޯސާވުން ކުޑަވެގެންދާނެ ކަމަށް މިނިސްޓަރ ޔަގީން ކުރައްވައެވެ.

ޕޯލްޓްރީ ފާމަކީ ބިސް ނުވަތަ ކުކުޅުމަސް ކަހަލަ ތަކެތި އުފައްދާ ތަންތަނެވެ. އެތަނުގެ ތެރޭގައި ކުކުޅުތައް ތިބޭއިރު އެއަށް ބޭނުންވާ ކާނާއާއި ފެނާއި އެކަށީގެންވާ ފަރުވާ ލިބޭނެ ގޮތަށް ކުކުޅުތައް ބެހެއްޓޭނެ ކޮންޓްރޯލް ކުރެވިފައިވާ މާހައުލެއް ހިމެނޭނެއެވެ. ކުކުޅުތަކުން އުފައްދާ ބިސް ކޮންމެ ދުވަހަކު އެއްކޮށް، ތަރުތީބުކޮށް، ޕެކޭޖްކޮށްގެން ބާޒާރަށް ނެރެވޭނެއެވެ.

ސަރުކާރުން ޕްލޭން ކޮށްފައިވާ މި މަޝްރޫއު ފެށުމާއެކު، ޕޯލްޓްރީ ފާމް ފުރިހަމައަށް ހިންގަން މަދު މަސްކޮޅެއް ނަގާނެ އެވެ. އާންމުކޮށް ކުކުޅު ބިސް ފީވުމަށްފަހު ބޮޑުވާން ނަގަނީ ގާތްގަނޑަކަށް 18 އާއި 20 ހަފްތާ އެވެ. އެހެންކަމަށް ވާނަމަ ކުކުޅުތައް ފެސިލިޓީއަށް ތައާރަފް ކުރާތާ ހަތަރު ފަސް މަސް ދުވަހުގެ ތެރޭގައި ބިސް ލިބޭނެ އެވެ. މި ފާމް ސައިކަލްތަކަކަށް ބަހާލައިގެން ހިންގާއިރު، ރާއްޖޭގެ ބޭނުންތައް ފުއްދައިދިނުމަށް މެދުނުކެނޑި އިތުބާރު ހުރި ބިސް ލިބޭނެކަން ކަށަވަރުކޮށްދީ، އިމްޕޯޓް ބިހަށް ބަރޯސާވުން ކުޑަކުރެވޭނެ އެވެ.