ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)ގެ ރައީސްކަމުގެ މަގާމަށް، ކުރީގެ މިނިސްޓަރު ޑރ. އައިޝަތު ރަމީލާ އައްޔަންކުރެއްވުމަށް ރައްޔިތުންގެ މަޖިލީހަށް މިއަދު ފޮނުއްވައިފި އެވެ.
ދައުރުން ބޭރުން މިއަދު ކުރިއަށްދާ ޖަލްސާގައި، މަޖިލީހުގެ ރިޔާސަތުން ވަނީ ޑރ. ރަމީލާގެ ނަން ދިރާސާކުރުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއަށް ފޮނުވައިފަ އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީފުޅެއްގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ގާނޫނު ނަމްބަރު 6/2006 (ހިއުމަން ރައިޓްސް ކޮމިޝަންގެ ގާނޫނު)ގެ އަށް ވަނަ މާއްދާގެ (ހ) ގައިވާ ގޮތުގެ މަތިން އެޗްއާރްސީއެމްގެ ރައީސް އައްޔަންކުރުމަށްޓަކައި، އެ މާއްދާގެ (ނ) ގައިވާ ގޮތުގެ މަތިން ޑރ. އައިޝަތު ރަމީލާގެ ނަންފުޅު މަޖިލީހަށް ހުށަހަޅުއްވާ ކަމަށެވެ. މިކަމުގައި މަޖިލީހުން ދެކޭ ގޮތެއް ބަލައިދިނުމަށް ރައީސް ފޮނުއްވި ސިޓީފުޅުގައި ވަނީ އެދިވަޑައިގެންފަ އެވެ.
Advertisement
ޑރ. ރަމީލާ އެޗްއާރުސީއެމައަށް އައްޔަންކުރެއްވީ މިދިޔަ އަހަރުގެ އޮކްޓޯބަރު މަހުގެ ތެރޭގަ އެވެ.
މި ސަރުކާރުގެ ފުރަތަމަ އެގްރިކަލްޗާ މިނިސްޓަރުގެ މަގާމުގައި ހުންނެވުމަށް ފަހު، ސިއްހީ ހާލަތު ހުރިގޮތުން 2024 ވަނަ އަހަރުގެ ޑިސެމްބަރު މަހުގެ ތެރޭގައި ޑރ. ރަމީލާ ވަނީ މިނިސްޓަރުކަމުން އިސްތިއުފާ ދެއްވައިފަ އެވެ.
