އެގްރިކަލްޗަރ މިނިސްޓްރީގެ ކުރީގެ މިނިސްޓަރު ޑރ. އައިޝަތު ރަމީލާ، އެޗްއާރުސީގެ މެމްބަރުކަމަށް އައްޔަން ކުރެއްވުމަށް އެކަމަނާގެ ނަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ރައްޔިތުންގެ މަޖިލީހަށް ފޮނުއްވައިފި އެވެ.
އެޗްއާރުސީއެމަށް ބޭފުޅަކު އައްޔަން ކުރަނީ އެ ކޮމިޝަނުގެ މެމްބަރު މަރްޔަމް މުނާގެ މެމްބަރުކަމުގެ މުއްދަތު ހަމަވާތީ އެވެ. ނޮވެމްބަރު 30 އަށް މުނާގެ މެމްބަރުކަން ހަމަވާތީ އެ މަގާމަށް ކުރިމަތިލާން ހުޅުވާލުމުން ރައްޔިތުން މަޖިލީހުގެ ރުހުން ހޯއްދެއްވުމަށް ރައީސުލްޖުމްހޫރިއްޔާ ފޮނުއްވާފައިވަނީ ރަމީލާގެ ނަން އެކަންޏެވެ.
މި ސަރުކާރުގެ މިނިސްޓަރުކަން ކޮށްފައިވާ ރަމީލާ، ސިއްހީ ސަބަބުތަކާ ގުޅިގެން އެ މަގާމުން އިސްތިއުފާ ދީފައިވަނީ ނިމިދިޔަ އަހަރު ޑިސެމްބަރު މަހުގައެވެ. ކެންސަރުގެ ނުރައްކާ ބަލީގެ ޝިކާރައަށް ވެފައިވާ އެކަމަނާ ވަނީ އެގްރިކަލްޗަރ މިނިސްޓަރު ކަމުގައި ހުންނެވި މަދު ދުވަސްކޮޅުގެ ތެރޭގައި ގިނަ ކާމިޔާބީތަކެއް ހޯއްދަވާފައެވެ.
1990 ވަނަ އަހަރު ނަރުހެއްގެ ގޮތުގައި ކެރިއަރު ފެށި ރަމީލާ ވަނީ ހެލްތް މިނިސްޓްރީގެ ސްޓޭޓް މިނިސްޓަރެއްގެ މަގާމު ރައީސް ޑރ. ވަހީދާއި ރައީސް ޔާމީންގެ ސަރުކާރުގައި އަދާކޮށްފައެވެ. އަދި ރާއްޖޭގެ މެޑިކަލް އެންޑް ޑެންޓަލް ކައުންސިލްގެ ރެޖިސްޓްރާގެ މަގާމު ވެސް އެކަމަނާ ފުރުއްވާފައިވެއެވެ.
ސޯޝަލް ސައިންސްގެ ދާއިރާއިން އެކަމަނާ ޕީއެޗްޑީ ހާސިލްކޮށްފައިވަނީ 2010 ވަނަ އަހަރު މެލޭޝިއާގައެވެ.
