ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) ގެ ރައީސްގެ މަގާމަށް، ކުރީގެ މިނިސްޓަރު ޑރ. އައިޝަތު ރަމީލާ އައްޔަންކުރެއްވުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ފާސްކޮށްފި އެވެ.
މިދިޔަ އަހަރުގެ އޮކްޓޫބަރު މަހުގެ 29 ވަނަ ދުވަހު ބޭއްވި މަޖިލީހުގެ ޖަލްސާގައި އެޗްއާރުސީއެމްގެ މެންބަރުކަމަށް އައްޔަންކުރަން ފާސްކުރި ޑރ. ރަމީލާ، އެ މަގާމަށް އައްޔަންކުރެއްވީ މިދިޔަ ޑިސެންބަރު މަހުގެ 3 ވަނަ ދުވަހު އެވެ. އެ ކޮމިޝަނުގެ ރައީސްގެ މަގާމު ހުސްވީ، ކުރިން އެ މަގާމުގައި ހުންނެވި މަރިޔަމް މުނާގެ މެންބަރުކަމުގެ ދައުރު ހަމަވުމާ ގުޅިގެންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެޗްއާރުސީއެމްގެ ރައީސްގެ މަގާމަށް ޑރ. ރަމީލާ އައްޔަންކުރެއްވުމަށް ހުށަހެޅުއްވި މައްސަލަ ދިރާސާކުރި ހިއުމަން ރައިޓްސް އެންޑް ޖެންޑަރ ކޮމިޓީން އެކަމަނާގެ ނަން ފާސްކުރީ ކޮމިޓީގައި ބައިވެރިވި މެންބަރުންގެ އިއްތިފާގުންނެވެ. ކޮމިޓީން އެކަމަނާގެ ނަން ފާސްކުރުމާ ގުޅިގެން އެ ނިންމުމުގެ ރިޕޯޓު ހުށަހެޅުމަށް ދައުރުން ބޭރުން މަޖިލީހުގެ ޖަލްސާއެއް ބޭއްވުމަށް މިހާރު ވަނީ އެޖެންޑާކޮށްފަ އެވެ.
Advertisement
ޑރ. ރަމީލާއަކީ މި ސަރުކާރުގެ ފުރަތަމަ ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ މިނިސްޓަރެވެ. ނަމަވެސް ސިއްހީ ސަބަބުތަކާ ހުރެ 1 ޑިސެންބަރު 2024 ގައި އެކަމަނާ ވަނީ އެ މަގާމުން އިސްތިއުފާ ދެއްވާފައެވެ.
އެޗްއާރުސީއެމްގެ ގާނޫނު ބުނާގޮތުން ކޮމިޝަނުގެ މެންބަރުންގެ ތެރެއިން މެންބަރަކު އެ ކޮމިޝަނުގެ ރައީސްގެ މަގާމަށް އައްޔަންކުރައްވާނީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ އެވެ.
މިހާރު އެޗްއާރުސީއެމްގައި ތިއްބަވަނީ ޖުމްލަ 5 މެންބަރުންނެވެ. އެއީ ޑރ. އައިޝަތު ރަމީލާގެ އިތުރުން، ކޮމިޝަންގެ ނައިބު ރައީސް މުހައްމަދު ޝަފީގް މަހުމޫދާއި، މެންބަރު ސަމާއު އަހުމަދު ނަޖީބާއި، އިސްމާއިލް ހަބީބު އަދި އަހްމަދު މަގުސޫމެވެ.
