މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ސަރުކާރަށް ބަރޯސާ ނުވެ ކުންފުނީގެ އާމްދަނީ އިތުރުކުރުމަށް އާ ޕްލޭންތަކެއް އެކުލަވާލާފައިވާ ކަމަށް އެ ކުންފުނީގެ ސީއީއޯ މުހައްމަދު ވަޖީހު އިބްރާހިމް ވިދާޅުވެއްޖެއެވެ.

މެރިޓައިމް ދާއިރާގެ އިސްފަރާތްތަކާއެކު އިއްޔެ އެމްޕީއެލްގައި ބޭއްވުނު ބައްދަލުވުމެއްގައި ވަޖީހު ވިދާޅުވި ގޮތުގައި، އެމްޕީއެލްއިން ކުރިމަގަށް ރާވާފައިވާ ގިނަ ޕްރޮޖެކްޓުތަކަކީ މެރިޓައިމް ދާއިރާއާ ގުޅުން ހުރި ކަންކަމެވެ. މި ގޮތުން އިހަވަންދިއްޕޮޅުގައި އިންޓަނޭޝަނަލް ބަންކަރިންގެ ޚިދުމަތް ހިމެނޭ ގޮތަށް މެރިޓައިމް އަދި އޯޕީއެލް (އޮފް ޕޯޓް ލިމިޓްސް) ސާވިސަސް ފޯރުކޮށްދިނުމުގެ މަސައްކަތް މި މަހު ތެރޭގައި ފަށާނެ ކަމަށް އޭނާ ވިދާޅުވިއެވެ. "އަޅުގަނޑުމެން ރާވާފައި މިވަނީ ކުންފުނީގެ އާމްދަނީ އިތުރުކޮށް، ޚިދުމަތްތައް ފުޅާކުރުމަށް ބޭނުންވާ މުހިންމު މަޝްރޫއުތަކެއް،" ވަޖީހު ވިދާޅުވިއެވެ.

އެމްޕީއެލްއިން ރާވާފައިވާ މަޝްރޫއުތަކުގެ ތެރޭގައި ތިން ސަރަހައްދެއްގައި ޓްރާންސްޝިޕްމަންޓް ބަނދަރު ހެދުމާއި، މެރިޓައިމް ހަބުތައް ގާއިމުކުރުމާއި، ޔޮޓް މެރީނާ ތަރައްގީކުރުމާއި، ކްރޫޒް ޓާމިނަލެއް ހެދުމާއި، ޑޮކްޔާޑާއި ބޯޓްޔާޑުގެ ޚިދުމަތްތައް ދީ ފުޅާކުރުމާއި، ލޮޖިސްޓިކްސް އަދި ވެއަރހައުސްތަކުގެ ޚިދުމަތްތައް އިތުރުކުރުން ހިމެނެއެވެ. މެރިޓައިމް އަދި އޯޕީއެލްގެ ޚިދުމަތް ގުޅިގެން ފޯރުކޮށްދިނުމުގެ ގޮތުން އެމްޕީއެލް އާއި އެސްޓީއޯއާ ދެމެދު އެމްއޯޔޫއެއްގައި ވަނީ ސޮއިކޮށްފައެވެ.

މި ބައްދަލުވުމުގައި މެރިޓައިމް ދާއިރާގެ ސްޓޭކްހޯލްޑަރުން ވަނީ މި ދާއިރާ އިތުރަށް ތަރައްގީ ކުރުމުގެ މުހިންމުކަން ފާހަގަކުރައްވާފައެވެ. އަދި މެރިޓައިމް ދާއިރާއާ ގުޅުންހުރި ހަރަކާތްތައް އިތުރުކުރުމަށާއި، މި މަސައްކަތްތައް ދެމެހެއްޓެނިވި ގޮތެއްގައި ކުރިއަށް ގެންދިއުމުގެ މުހިންމުކަން ފާހަގަކުރެއްވިއެވެ. މީގެ އިތުރުން، މެރިޓައިމް ދާއިރާގެ އިސް ފަރާތްތަކުން ވަނީ އެ ދާއިރާއާ ގުޅޭ ގޮތުން ހުރި ކަންބޮޑުވުންތައް ފާހަގަކޮށްފައެވެ. މީގެ ތެރޭގައި ތަމްރީނުވެފައިވާ މުވައްޒަފުންގެ ދަތިކަމާއި، ޒަމާނީ ވަސީލަތްތަކުގެ މަދުކަން ހިމެނެއެވެ.

މި ކަންކަން ހައްލުކުރުމަށް ސްޓޭކްހޯލްޑަރުން ހުށަހެޅި ޚިޔާލުތަކުގެ ތެރޭގައި މެރިޓައިމް ދާއިރާއަށް ޚާއްޞަ ތަމްރީނު ޕްރޮގްރާމްތައް ފެށުމާއި، ބައިނަލްއަޤްވާމީ މިންގަނޑުތަކާއި އެއްގޮތަށް ވަސީލަތްތައް އަޕްގްރޭޑް ކުރުމާއި، މެރިޓައިމް ދާއިރާއާ ގުޅޭ ޤާނޫނުތައް މުރާޖައާކޮށް އިޞްލާޙު ކުރުން ހިމެނެއެވެ.

ވަޖީހު ވިދާޅުވި ގޮތުގައި، މި ބައްދަލުވުމުގައި ހުށަހެޅުނު ޚިޔާލުތައް ވަރަށް ބޮޑަށް ބަލައިގަނެވޭ ކަމަށާއި، އަދި މި ހުރިހާ ކަމަކަށް ރިއާޔަތްކޮށް، ކުންފުނީގެ ކުރިއަށް އޮތް ޕްލޭންތައް އިތުރަށް ފުރިހަމަ ކުރާނެއެވެ.

"އަޅުގަނޑުމެން ކުރިއަށް ރާވާފައި ހުރި މަސައްކަތްތަކާ ގުޅޭ ގޮތުން މެރިޓައިމް ދާއިރާގެ އިސްފަރާތްތަކުގެ ޚިޔާލު ހޯދުމަކީ ވަރަށް މުހިންމު ކަމެއް. ހަމައެއާއެކު މިއަދަކީ އަޅުގަނޑު ވަރަށް އުފާވާ ދުވަހެއް. ސަބަބަކީ މި ކަމުގެ މީހުންނާއި އެކު ބައްދަލުކޮށް މަޝްވަރާ ކުރެވޭތީ،" ވަޖީހު ވިދާޅުވިއެވެ.

އެމްޕީއެލްއިން މި އާ ޕްލޭންތައް އެކުލަވާލުމާއެކު، ކުންފުނީގެ އާމްދަނީ އިތުރުވެ، މެރިޓައިމް ދާއިރާ އިތުރަށް ތަރައްޤީވެ، ޤައުމުގެ އިޤްތިޞާދަށް އިތުރު ކުރިއެރުންތަކެއް ލިބޭނެ ކަމަށް އުންމީދު ކުރެވެއެވެ. މި މަޝްރޫޢުތަކުގެ ސަބަބުން ރާއްޖޭގެ މެރިޓައިމް ދާއިރާ ބައިނަލްއަޤްވާމީ ފެންވަރަށް އަރައި، ސަރަޙައްދީ ފެންވަރުގައި ވާދަވެރި މަރުކަޒަކަށް ވެގެންދާނެ ކަމަށް ބެލެވެއެވެ.