ގޭގައި ކާބޯތަކެތި އުފައްދާ ފަރާތްތަކުގެ ދަފްތަރު އުޞޫލު ބިޒްނަސް ސެންޓަރ ކޯޕަރޭޝަން (ބީސީސީ) އިން ބާޠިލުކޮށްފިއެވެ. މި ބަދަލާ ގުޅިގެން މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ގޭގައި ކާބޯތަކެތި އުފެއްދުމާ ގުޅޭ އައު މިންގަނޑެއް ކަނޑައަޅައިފިއެވެ.

ބީސީސީއިން ދިވެހި ސަރުކާރުގެ ގެޒެޓްގައި ޝާއިޢުކުރި އިޢުލާނެއްގައި ބުނެފައިވާ ގޮތުގައި، މިހާރު ގޭގައި ކާބޯތަކެތި އުފައްދާ ފަރާތްތަކުން "ދިރިތި" ޕޯޓަލްގައި ރަޖިސްޓަރީކޮށް، އެމް.އެފް.ޑީ.އޭގެ އައު މިންގަނޑުތަކަށް ޢަމަލުކުރަންވާނެއެވެ.

އެމް.އެފް.ޑީ.އޭއިން ކަނޑައަޅާފައިވާ އައު މިންގަނޑުގައި އާންމު ޝަރުތުތަކާއި، ބަދިގޭގެ ޝަރުތުތަކާއި، ސާމާނާއި އާލާތްތަކުގެ ޝަރުތުތައް ހިމެނެއެވެ. މުހިންމު ޝަރުތުތަކުގެ ތެރޭގައި އިތުރު މުވައްޒަފުން ނުގެންގުޅުމާއި، "ބޭސިކް ފުޑް ސޭފްޓީ" ތަމްރީނު ފުރިހަމަކުރުމާއި، ކާބޯތަކެތި ރަނގަޅަށް ލޭބަލްކުރުން ހިމެނެއެވެ.

ބަދިގޭގެ ޝަރުތުތަކުގެ ތެރޭގައި އަތްދޮވުމާއި ސާމާނު ދޮވުމުގެ އިންތިޒާމު ހަމަޖެއްސުމާއި، ކާބޯތަކެތި ތައްޔާރުކުރާ ތަންތަނާއި ތަކެތި ސާފުކޮށް ބެލެހެއްޓުން ހިމެނެއެވެ. އަދި ހިފާގެންގުޅޭ ސާމާނުގެ ޝަރުތުތަކުގެ ތެރޭގައި ވިޔަފާރިއަށް ވަކި ތަށިމުށި ޚާއްޞަކުރުމާއި، ރޯ ކާނާއަށް ވަކި ތަށި ބޭނުންކުރުން ހިމެނެއެވެ.

މީގެ އިތުރުން، ކާނާ ރައްކާކުއި، ގަނޑުފިލުވުމާއި، ކުނި ނައްތާލުމާއި، ޖަނަވާރުންނާއި ސޫފާސޫފިން ރައްކާތެރިވުމާއި، ކާނާ އުފުލުމުގެ އުސޫލުތަކާއި، އެއާއި ގުޅޭ އެންމެހާ ކަމެއް ކަށަވަރުކުރުމަކީވެސް މި އައު މިންގަނޑުގެ ދަށުން ގޭގައި ކާބޯތަކެތި އުފައްދާ ފަރާތްތަކުން ސަމާލުކަން ދޭންޖެހޭ ކަންތައްތަކެވެ.

މި އައު މިންގަނޑުތައް ތަންފީޒުކުރުމުގެ މަޤްޞަދަކީ ގޭގައި އުފައްދާ ކާބޯތަކެތީގެ ރައްކާތެރިކަމާއި ފެންވަރު ހިފެހެއްޓުމެވެ. އަދި މިކަމުގެ ސަބަބުން ސާފުތާހިރުކަމާއެކު ރައްކާތެރި ކާބޯތަކެތި އުފެއްދުމަށް މަގުފަހިވެގެންދާނެ ކަމަށް ބެލެވެއެވެ.