ނުރައްކާތެރި ޓްރެފިކް އެކްސިޑެންޓްތައް ގިނަވުމާ ގުޅިގެން ހަރުކަށި ފިޔަވަޅު އެޅުމަށް ޤާނޫނާއި ޤަވާޢިދުތަކަށް ބަދަލުގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.

ސޯޝަލް މީޑިއާގައި ރައީސް ކުރެއްވި ޕޯސްޓެއްގައި ވިދާޅުވީ ނުރައްކާތެރިކޮށް ދުއްވުމުގެ ސަބަބުން ހިނގި އެކްސިޑެންޓެއްގައި ރޭ މެންދަމު ވަރަށް ހިތާމަވެރި ޙާދިސާއެއް ހިނގާ، މީހެއްގެ ފުރާނަ ގެއްލިފައިވާކަމަށެވެ. މިފަދަ ހިތާމަވެރި ހާދިސާތައް ހިނގުން ހުއްޓުވުމަކީ އެކަމުގައި ހުރިހާ ފަރާތްތަކެއްގެވެސް އެއްބާރުލުން ބޭނުންވާ ކަމެއް ކަމަށް ރައީސް ވިދާޅުވިއެވެ.

ރައީސް ވިދާޅުވީ މާލެއާއި ރާއްޖޭގެ އެހެނިހެން ރަށްރަށުގެ މަގުތަކަކީ އެންމެނަށްވެސް އަމާންކަމާއެކު ބޭނުންކުރެވޭނެ ތަންތަންކަމުގައި ހެދުމަށްޓަކައި ސަރުކާރުން ކުރަންޖެހޭ އެންމެހާ ކަންތައްތައް މި ސަރުކާރުން ކުރާނެ ކަމުގެ ޔަޤީންކަން ހުރިހާ ރައްޔިތުންނަށް އަރުވާ ކަމަށެވެ. އެގޮތުން ރާއްޖޭގެ އެއްވެސް ރަށެއްގައި އެއްވެސް ވަގުތަކު ބާރު ސްޕީޑުގައި ވެހިކަލް ދުއްވާ ފަރާތްތަކާ މެދު ހަރުކަށި ފިޔަވަޅުތައް އެޅުމަށް ޤާނޫނުތަކާއި ޤަވާޢިދުތަކަށް ގެންނަންޖެހޭ ބަދަލުތައް ގެނެސް، އެކަން ތަންފީޒުކުރަން ފަށަން ސަރުކާރުގެ ކަމާގުޅުންހުރި އިދާރާތަކަށް މިހާރު އަންގަވާފައިވާކަމަށް ރައީސް ވިދާޅުވިއެވެ.

ރައީސްގެ ޕޯސްޓުގައި ވަނީ ރޭ ހިނގި ނުރައްކާތެރި އެކްސިޑެންޓުގައި މި ދުނިޔެ ދޫކުރި އުމުރުން 23 އަހަރުގެ ހަސަން ސަމާހުގެ ފުރާނައަށް ސުވަރުގޭގެ ދާއިމީ ނިޢުމަތް މިންވަރު ކުރައްވާ، ޢާއިލާއަށް ކެތްތެރިކަން ދެއްވުމަށް އެދި ދުޢާ ކުރައްވާފައެވެ.

މި އެކްސިޑެންޓާ ގުޅިގެން ކުރަން ޖެހޭ ތަހުޤީޤުތައް ފުލުހުން ކުރަމުން އަންނަ އިރު، ފުލުހުން މިއަދު ވަނީ އެކްސިޑެންޓާ ގުޅިގެން، ކާރު ދުއްވި މީހާގެ ވަނަވަރު ހާމަކޮށްފައެވެ. އެގޮތުން މި އެކްސިޑެންޓާ ގުޅިގެން ހައްޔަރުކޮށްފައިވަނީ ސ. ހިތަދޫ، ވައިލެޓްފެހި، މުޙައްމަދު ވިސާމް ސިއްދީޤު (26އ) އެވެ.