މާލެ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ) އިން އަޅާފައިވާ ޚަރަދު ކުޑަކުރުމުގެ ފިޔަވަޅުތަކުގެ ނަތީޖާ ފެންނަން ފަށައިފިކަމަށް އެ ކުންފުނީގެ މެނޭޖިންގ ޑިރެކްޓަރ ޢަބްދުލް މަތީން މުޙައްމަދު ވިދާޅުވެއްޖެއެވެ.

ޕީއެސްއެމް ނިއުސްގެ "ރާއްޖެމިއަދު" ޕްރޮގްރާމުގައި ވާހަކަފުޅު ދައްކަވަމުން މަތީން ވިދާޅުވީ، މިއަހަރުގެ ފުރަތަމަ ކުއާޓަރުގައި ކުންފުންޏަށް 76.2 މިލިއަން ރުފިޔާގެ ސާފު ފައިދާއެއް ލިބިފައިވާ ކަމަށެވެ. މިއީ މިދިޔަ އަހަރާ އަޅާބަލާއިރު 40.3 މިލިއަން ރުފިޔާގެ އިތުރުވުމެކެވެ.

މި މުއްދަތުގައި ކުންފުނީގެ އާމްދަނީގެ ގޮތުގައި 334 މިލިއަން ރުފިޔާ ލިބިފައިވާއިރު، ޖުމްލަ ފައިދާގެ ގޮތުގައި 181 މިލިއަން ރުފިޔާ އަދި ހިންގުމުގެ ފައިދާގެ ގޮތުގައި 95 މިލިއަން ރުފިޔާ ލިބިފައިވާކަމަށާއި މިދިޔަ އަހަރާ އަޅާބަލާއިރު އާމްދަނީ ދަށްވިނަމަވެސް، ޚަރަދުތައް ކުޑަކުރުމުގެ ސަބަބުން ކުންފުންޏަށް ބޮޑު ފައިދާއެިދާއެއް ލިބިފައިވާކަމަށް މަތީން ހާމަކުރެއްވިއެވެ.

މީގެ އިތުރުން، ކުންފުނީގެ ފައިދާ އިތުރުވުމަށް މަގުފަހިވި ސަބަބުތަކުގެ ތެރޭގައި ޑޮލަރު ގަތުމުގެ އަގު 18.50 ރުފިޔާއިން 15.45 ރުފިޔާއަށް ދަށްކުރެވުނުކަމާއި، ޕްރޮކިއުމަންޓްގައި އަގު ހެޔޮކުރެވުނުކަން މަތީން ފާހަގަކުރެއްވިއެވެ. މީގެ އިތުރުން، ކޮންމެހެން ކުރަން ނުޖެހޭ ޚަރަދުތައް ނުކުރުމާއި، މުވައްޒަފުންގެ ބުރަ މަސައްކަތުން ފުރަތަމަ ކުއާޓަރުގައި ބޮޑު ފައިދާއެއް ލިބުނުކަންވެސް އެމަނިކުފާނު ވިދާޅުވެފައިއެވެ.

އެމްޑަބްލިޔުއެސްސީއަކީ މާލެ ސަރަހައްދަށް ފެނާއި ނަރުދަމާގެ ޚިދުމަތްދޭ މައި ކުންފުންޏެވެ. މަތީން ވިދާޅުވިގޮތުގައި ކުންފުކުންފުނީގެ އާމްދަނީ ލިބެނީ 4 ބަޔަކުން ކަމަށާއި، އޭގެތެރޭގައި 70 އައިޓަމް ވިއްކުމާއި ވިޔަފާރި ހިމެނެއެވެ.