މާލެ ވޯޓާ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އިން 17 މިލިއަން ރުފިޔާއަށް ލޭންޑިންގ ކްރާފްޓެއް ގަތް ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކަކީ އެއްވެސް އަސާސެއް ނެތް، ކަނޑައެޅިގެން ދޮގު އަދި ހަގީގަތް އޮޅޭ ގޮތަށް ފަތުރާފައިވާ ވާހަކަތަކެއް ކަމަށް ބުނެ އެ ކުންފުނީގެ މެނޭޖިން ޑިރެކްޓަރު ހުސައިން ފަހުމީ އެ ތުހުމަތުތައް ދޮގުކުރައްވައިފިއެވެ.

މި ތުހުމަތުތައް ފެންމަތިވެފައިވަނީ، 900،000 ރުފިޔާގެ އަގުހުރި ބާ ލޭންޑިންގ ކްރާފްޓެއް ރައްޔިތުންގެ މަޖިލީހުގެ މެންބަރު އިބްރާހީމް ފަލާހުގެ އަތުން 17 މިލިއަން ރުފިޔާއަށް އެމްޑަބްލިޔުއެސްސީން ގަނެފައިވާ ކަމަށް ބުނެ އެކްސް ގައި ކޮށްފައިވާ ޕޯސްޓުތަކަކާ ގުޅިގެންނެވެ. މީގެއިތުރުން، އެ އުޅަނދު މަރާމާތު ކުރުމަށް އިތުރު 1.8 މިލިއަން ރުފިޔާ ހޭދަކުރި ކަމަށާއި، ފަލާޙުގެ އަތުން ދެވަނަ އުޅަނދެއް ގަތުމަށް ވެސް އެ ކުންފުނިން މަސައްކަތް ކުރަމުންދާ ކަމަށް އެ ޕޯސްޓުގައި ތުހުމަތުކޮށްފައިވެއެވެ.

މިކަމާ ގުޅިގެން ފަހުމީ ވިދާޅުވީ، 2023 ވަނަ އަހަރުން ފެށިގެން މިހާތަނަށް އެފަދަ އެއްވެސް މުއާމަލާތެއް އެމްޑަބްލިޔުއެސްސީން ހިންގާފައި ނުވާނެ ކަމަށެވެ. އަދި އޭނާއަށް އެނގިވަޑައިގެންފައިވާ ގޮތުގައި އެފަދަ މުއާމަލާތަކަށް ކުންފުނީގެ ބޯޑުން އެއްވެސް ހުއްދައެއް ދީފައި ނުވާ ކަމަށާއި، އެއްވެސް ފަރާތަކާ އެކު އެފަދަ ގަތުމަކާ ބެހޭ ގޮތުން މަޝްވަރާ ވެސް ކުރެވިފައި ނުވާ ކަމަށް އޭނާ ފާހަގަކުރެއްވިއެވެ.

މީގެއިތުރުން، މި އުޅަނދު ގަތުމަށް ހުއްދަ ދޭން ދެކޮޅު ހެއްދެވުމުގެ ސަބަބުން އެމްޑަބްލިޔުއެސްސީގެ ބޯޑު މެންބަރު އުމަރު ޙުސައިން އިސްތިއުފާ ދެއްވި ކަމަށް ކުރެވޭ ތުހުމަތު ވެސް ފަހުމީ ވަނީ ދޮގުކުރައްވާފައެވެ. ފަހުމީ ވިދާޅުވީ އުމަރު އިސްތިއުފާ ދެއްވީ އަމިއްލަ ސަބަބުތަކަކާ ހުރެ ކަމަށާއި، އޭނާގެ ވަކިވުމާ މި މުއާމަލާތާ އެއްވެސް ގުޅުމެއް ނެތް ކަމަށެވެ.

މިއީ ސީރިއަސް ތުހުމަތުތަކެއްކަން ފާހަގަކުރައްވަމުން ފަހުމީ ވިދާޅުވީ، އެކަށީގެންވާ ހެއްކެއް ނެތި މިފަދަ ވާހަކަތައް ހަގީގަތެއްގެ ގޮތުގައި ހާމަކޮށްގެން ނުވާނެ ކަމަށެވެ. އަދި އެމްޑަބްލިޔުއެސްސީން އަބަދުވެސް މަސައްކަތް ކުރަމުން ދަނީ ދެފުށް ފެންނަ، ޒިންމާދާރު އަދި ހަމަޖެހިފައިވާ އުސޫލުތަކުގެ ތެރެއިން ކަމަށް ވެސް އޭނާ ވިދާޅުވިއެވެ.

ސޯޝަލް މީޑިއާގައި މި ތުހުމަތުތައް ކޮށްފައިވީ ނަމަވެސް، އެ އުޅަނދުގެ އަގަކީ 900،000 ރުފިޔާ ކަމަށް ނުވަތަ 17 މިލިއަން ރުފިޔާއަށް އެ އުޅަނދު ގަތް ކަމަށް ސާބިތުކޮށްދޭ އެއްވެސް ލިޔެކިޔުމެއް ހާމަކޮށްފައެއް ނުވެއެވެ.

މި އަހަރުގެ އެޕްރީލް މަހު އެމްޑަބްލިޔުއެސްސީގެ އެމްޑީ ކަމާ ހަވާލުވެވަޑައިގެންނެވި ފަހުމީ، އޭގެ ކުރިން ވަނީ ރައީސުލްޖުމްހޫރިއްޔާގެ ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕޮލިސީ އެންޑް މެނިފެސްޓޯގެ މަގާމާއި ސްޓެލްކޯގެ އިސް މަގާމުތައް ވެސް ފުރުއްވާފައެވެ. ސަރުކާރު ހިއްސާވާ ކުންފުންޏެއްގެ ގޮތުގައި ފެނާއި ނަރުދަމާގެ ހިދުމަތް ދެމުން އަންނަ އެމްޑަބްލިޔުއެސްސީން ދަނީ ކުންފުނީގެ ހިންގުމުގެ އުސޫލުތަކާ އެއްގޮތަށް އަހަރީ އަދި ކުއާޓަރު ރިޕޯޓުތައް ގަވާއިދުން އާންމުކުރަމުންނެވެ.