ކޮންމެ ދިވެއްސަކުވެސް ޤައުމުގެ އިޤުތިޞާދީ އަދި ސިޔާސީ މިނިވަންކަން ދެމެހެއްޓުމަށް ޢަޒުމު ކަނޑައަޅަންވާނެ ކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް މިއަދު ވިދާޅުވެއްޖެއެވެ. ނައިބު ރައީސް މިހެން ވިދާޅުވެފައިވަނީ މިއަހަރުގެ ޤައުމީ ދުވަހާ ގުޅިގެން ދެއްވި ޚިޠާބުގައެވެ.

ނައިބު ރައީސްގެ ޚިޠާބުގައި ފާހަގަކުރެއްވި ގޮތުގައި، އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޒަމް ޕޯޗުގީޒުންނާ ދެކޮޅަށް ކުރެއްވި ޖިހާދަކީ ހުރިހާ ޒަމާނަކަށް އޮތް ނަމޫނާއެކެވެ. އަދި ދިވެހިންގެ އަމިއްލަވަންތަކަން ދެމެހެއްޓުމަށް ޤައުމީ ދުވަހުގައި ޢަޒުމު ކަނޑައެޅުމުގެ މުހިންމުކަން އެމަނިކުފާނު ފާހަގަކުރެއްވިއެވެ.

"ބޮޑުތަކުރުފާނުގެ ޖިހާދުން ޢިބުރަތް ޙާސިލްކޮށް ޤައުމުގެ ޙައްޤުގައި ޖިހާދުކުރާނެ ޚިދުމަތްތެރި ދަރިންތަކެއް ބިނާކުރުމަށް އަޅުގަނޑުމެން މިއަދު ޢަޒުމު ކަނޑައަޅަންޖެހޭ. ސަރުކާރުގެ ސިޔާސަތަކީ އެންމެ ފުރަތަމަ މި ޤައުމަށް އިސްކަންދިނުމުގެ ސިޔާސަތު. ރައީސް އަބަދުވެސް ގެންދަވަނީ ދިވެހި ޤައުމުގެ މިނިވަންކަމާއި ދިވެހިންގެ އަމިއްލަވަންތަކަން ކަށަވަރުކޮށް ބޭއްވުމަށް މަސައްކަތްކުރައްވަމުން." ނައިބު ރައީސް ވިދާޅުވިއެވެ.

ނައިބު ރައީސް ވިދާޅުވީ، ޤައުމުގެ މިނިވަންކަމަށް އެއްވެސް ގޮތަކުން އުނިކަމެއް އަތުވެދާނެ ފަދަ ކަމަކަށް ޖާގައެއް ނުދެއްވާނެ ކަމަށެވެ. އަދި ޤައުމީ ދުވަހުގެ މުނާސަބަތުގައި ދެއްވި ތަހުނިޔާގައި، ޤައުމަށް ޚިދުމަތް ކުރުމުގައި ދެމިތިބުމަށް އެންމެހައި ރައްޔިތުންނަށް ގޮވާލެއްވިއެވެ.

ޤައުމީ ދުވަހަކީ ރަބީޢުލްއައްވަލް މަހުގެ 1 ވަނަ ދުވަހެވެ. މިއީ 1573 ވަނަ އަހަރު ޕޯޗުގީޒުންގެ އަޅުވެތިކަމުން މިނިވަންވި ދުވަހެވެ. އެދުވަހު 6 ބޭކަލަކު ޖިހާދުކޮށްގެން ދިވެހިރާއްޖެއަށް މިނިވަންކަން ހޯދައިދެއްވިއެވެ. މި ދުވަހުގެ ބަޠަލަކީ ހއ. އުތީމަށް އުފަން އައްސުލްޠާނުލް ޣާޒީ މުޙައްމަދު ތަކުރުފާނުލް އަޢުޒަމެވެ.