ޒުވާނުންގެ ވިސްނުން ރަނގަޅު ނޫން ފިކުރުތަކުން ސަލާމަތްކުރުމަށް މަސައްކަތްކުރަން ޖެހޭ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ، ރައީސް މިހެން ވިދާޅުވީ ޤައުމީ ދުވަހުގެ މުނާސަބަތުގައި މިއަދު އިތް ޖަލްސާގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ޤައުމުގެ އެންމެ މުހިންމު ވަސީލަތަކީ އިންސާނީ ވަސީލަތް ކަމަށާއި، ޤައުމު ދެމެހެއްޓުމަށްޓަކައި އެންމެ އިސްކަމެއް ދޭންޖެހެނީ ރައްޔިތުންގެ ރައްކާތެރިކަމަށެވެ. އަދި ދީނާއި ޤައުމިއްޔަތާ ދެކޮޅު ޙަރަކާތްތަކުގެ ނުރައްކާތެރިކަން ފާހަގަކުރައްވައި، ޢާލަމީ ބަވަނަވުމުގެ ސަބަބުން ނުރައްކާތެރި ފިކުރީ ކާރިސާތައް ކުރިމަތިވަމުންދާ ކަމަށާއި، ބާރުގަދަ ޤައުމުތަކުގެ ސިޔާސީ އެޖެންޑާތަކުގެ ސަބަބުން ނޭދެވޭ އަސަރުތަކެއް ކުރަމުންދާ ކަމަށް ވިދާޅުވިއެވެ.

ރައީސް ވިދާޅުވި ގޮތުގައި، މިފަދަ އިޖްތިމާޢީ އޮއިވަރުތަކުގައި ޒުވާން ޖީލު ހިމެނިގެންދާއިރު، އޭގެ ނޭދެވޭ އަސަރު ވަޒަންކުރެވެނީ ވަރަށް މަދު ބަޔަކަށެވެ. މީގެ ސަބަބުން ޤައުމުގެ އެއްބައިވަންތަކަމަށް ބޮޑެތި ގެއްލުންތަކެއް ލިބި، އަދި މުޖުތަމަޢުގެ ޤަދަރުވެރިންނާއި ދީނީ ޢިލްމުވެރިންގެ މަޤާމު ދަށްވެގެންދާ ކަމަށްވެސް ރައީސް ފާހަގަކުރެއްވިއެވެ.

"ދީން ދިފާޢު ކުރުމުގެ އެންމެ ބޮޑު ޤާނޫނީ ބާރެއް އޮންނަނީ ޤައުމުގެ ވެރީންގެ ކިބައިގައި ކަމަށްވާތީ ވެރީންގެ އަގުވައްޓާލެވޭ. މުއައްސަސާތައް ޤުރުބާންކޮށްލެވޭ. ސޯޝަލް މީޑިޔާއާއި އެ ނޫންވެސް މީޑިޔާގެ ވަސީލަތްތައް މެދުވެރިކޮށް އުފެއްދޭ ތަފާތު އުފެއްދުންތަކުން ޤައުމުގެ މުޅި ޖަމާޢީ ސިކުނޑި ވިހަކޮށްލެވޭ. ކުޑަކުދީންނާއި ޒުވާނުންނާއި ހަރުމީހުންނަށް ދާންދެން ދީނާ ޚިލާފު، ޤައުމަށް ގެއްލުންހުރި އެތައް ވިސްނުންތަކަކާއި އަމަލުތަކެއްގެ ކަނޑަށް ޣަރަޤުކޮށްލެވޭ" ރައީސް ވިދާޅުވިއެވެ.

މީގެ އިތުރުން، ރައީސް މުޢިއްޒު އިސްކަންދެއްވާފައިވަނީ ހަރުކަށި ފިކުރުތަކުން އާ ޖީލުތައް ސަލާމަތްކުރުމުގެ މުހިންމުކަމަށެވެ. މި މަސައްކަތުގައި ބެލެނިވެރިންނާއި، މުދައްރިސުންނާއި އަދި މުޅި މުޖުތަމަޢުގެ ޒިންމާދާރު ބައިވެރިވުމަށް އެދިވަޑައިގެންނެވިއެވެ. އަދި ކުރިމަތިވެފައިވާ ގޮންޖެހުންތަކުން ފިލާވަޅު ލިބިގަނެ، ޤައުމީ ހޭލުންތެރިކަން އިތުރުކުރުމުގެ މުހިންމުކަން ފާހަގަކުރައްވައި، ހުރިހާ ދިވެހި ރައްޔިތުން އެއްބައިވަންތަކަމާއެކު އިޞްލާޙީ މަސައްކަތްތަކުގައި ބައިވެރިވުމަށް ގޮވާލެއްވިއެވެ.