ޝަރުޢީ ކޯޓަކަށް ވަކި މައްސަލައެއް ހުށަނާޅަނީސް، ޤާނޫނުތަކުގެ އިސްލާމްވަންތަކަން އަމަލީ ގޮތުން ކަށަވަރުކުރެވޭނެ ނިޒާމެއް ނެތުމަކީ ބޮޑު ހުސްކަމެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ހއ. އުތީމުގައި ބޭއްވި ޤައުމީ ދުވަހުގެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ ޤާނޫނުތަކުގެ އިސްލާމްވަންތަކަން ކަށަވަރުކުރުމުގެ ޒިންމާ އޮންނަނީ ކޯޓުތަކަށް ކަމަށެވެ.
ޤާނޫނުތައް ފާސްވެ އަމަލުކުރަން ފެށުމުގެ ކުރިން އޭގެ އިސްލާމްވަންތަކަން ކަށަވަރުކުރެވޭނެ ހަރުދަނާ އޮނިގަނޑެއް ގާއިމުކުރުމަށް ބޭނުންވާ ޤާނޫނީ އިސްލާޙުތައް މަޖިލީހުގެ މި އަހަރުގެ ތިންވަނަ ދައުރަށް ހުށަހަޅުއްވާނެކަމުގެ ފުރިހަމަ ޔަޤީންކަން ރައީސް ދެއްވިއެވެ.
މިހާރު އޮތް ނިޒާމީ ހުރަސްތަކަށް ނިމުމެއް ގެންނަވާނެކަމަށް އެމަނިކުފާނު ފާހަގަކުރެއްވިއެވެ.
Advertisement
ރައީސް ވިދާޅުވީ ދިވެހި ޤައުމިއްޔަތުގެ އަސްލަކީ އިސްލާމްދީންކަމަށާއި، ދީނާ ދުރު ސިޔާސަތުތައް ތަންފީޒުކުރަން އުޅުމަކީ ޤައުމުގެ މިނިވަންކަމަށް ބޮޑު ނުރައްކަލެއް ކުރިމަތިވާނެ ކަމެއްކަމަށެވެ. ދީން ދޫކޮށްލުމަކީ ދިވެހިރާއްޖޭގެ މިނިވަންކަމާއި ސިޔާދަތަށް ކުރެވޭ ޚިޔާނާތެއްކަމަށް އެމަނިކުފާނު ހަނދާންކޮށްދެއްވިއެވެ.މި ޖަލްސާގައި ޤައުމީ ޖިހާދުގެ ތާރީޚަށް އަލިއަޅުވާލައްވައި، އެންމެން އެއް އަޒުމެއްގައި ދެމިތިބުމަށް ރައީސް ގޮވައިލެއްވިއެވެ.
