ރައީސް ޑރ. މުޙައްމަދު މުޢިއްޒު ދިވެހިންގެ އަސްލުވަންތަކަމާއި ހުނަރުވެރިކަން އިޢާދަކުރުމަށް ޚާއްސަ އިސްކަމެއް ދެއްވާކަމަށް ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.
މިއަދު ބޭއްވުނު ޤައުމީ ދުވަހުގެ ރަސްމީ ޖަލްސާގައި ވަޒީރު އާދަމް ނަޞީރު ވިދާޅުވީ، ދިވެހިންގެ ޒަމާންވީ ރަނގަޅު ސިފަތަކާއި އަސްލުވަންތަކަން އިޢާދަކުރުމަށް ރައީސް އިސްކަންދެއްވާތީ ޝުކުރު އަދާކުރައްވާ ކަމަށެވެ. އަދި ދިވެހި ޤައުމިއްޔަތު، އަމިއްލަވަންތަކަން އަދި ތާރީޚު ދިރުވުމަށް ގިނަ ބަޔަކު ޝައުޤުވެރިވާކަންވެސް ވަޒީރު ފާހަގަކުރެއްވިއެވެ.
"އަޅުގަނޑު ގާތު މީހަކު ދެންނެވި އަޅުގަނޑުމެން މިތިބީ ޤައުމިއްޔަތަށާއި ދިވެހިން އަސްލުވަންތަކަން އަލުން އިޢާދަކުރައްވާނެ ރައީސެއްގެ އިންތިޒާރުގައޭ. ރައީސް މުޢިއްޒަކީ އެފަދަ ބޭފުޅެއް." ވަޒީރު ވިދާޅުވިއެވެ.
Advertisement
ދިވެހި ޤައުމިއްޔަތު އާލާކުރުމަށްޓަކައި ސަގާފީ ތަރިކަ ދިރާސާކުރާ ޤައުމީ މަރުކަޒެއް އުފައްދާފައިވާކަން ވަޒީރު ހާމަކުރެއްވިއެވެ. މި މަރުކަޒުން ދިވެހި ސަގާފަތް، ތަރިކަ އަދި ތާރީޚާ ގުޅޭ ދިރާސާތައް ކުރުމަށް ތައްޔާރުވަމުންދާކަންވެސް އެމަނިކުފާނު ވިދާޅުވިއެވެ.
އެގޮތުން، ޤައުމީ ދުވަސް ފާހަގަކުރަނީ ކޮންމެ އަހަރެއްގެ ރަބީޢުލްއައްވަލް މަހުގެ 1 ވަނަ ދުވަހު ކަމެވެ. މި ދުވަހަކީ މުޙައްމަދު ތަކުރުފާނުލް އަޢުޡަމް ޕޯޗުގީޒުންގެ އަޅުވެތިކަމުން ރާއްޖެ މިނިވަންކުރެއްވި ދުވަހުގެ ހަނދާން އާކުރުމަށް ފާހަގަކުރާ ދުވަހެކެވެ.
