ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމް، ސިނަމާލެ ބްރިޖް ޙަޤީޤަތަކަށް ވާނެކަމަށް ޤަބޫލުފުޅު ނުކުރައްވާކަމަށް ކުރީގެ ނައިބު ރައީސް އަޙްމަދު އަދީބު ޢަބްދުލްޣަފޫރު ވިދާޅުވެއްޖެއެވެ. ބްރިޖްގެ މަޝްރޫޢު ފެށުނު އިރު، ރައީސް ޔާމީން މަޝްޣޫލުވެ ވަޑައިގެން އުޅުއްވީ ތާސްކުޅުއްވުމާއި ސިންގަޕޫރުގައި ވިޔަފާރީގެ މުޢާމަލާތްތައް ހިންގެވުމުގައި ކަމަށް އަދީބު ހާމަކުރެއްވިއެވެ.
އަދީބު އިތުރަށް ފާހަގަކުރެއްވި ގޮތުގައި، ބްރިޖާ ގުޅޭ މަޝްވަރާތަކާއި ތައްޔާރީތައް ކުރިއަށް ގެންދެވީ އޭރުގެ ނައިބު ރައީސް އަދީބާއި އިކޮނޮމިކް ކައުންސިލުންނެވެ. އަދި މަޝްރޫޢުގެ ރޭވުންތެރިކަމުގެ މަރުޙަލާގައި ރައީސް ޔާމީންގެ އެއްބާރުލެއްވުން ވަރަށް މަދުކަން އަދީބު ފާހަގަކުރެއްވިއެވެ.
ބްރިޖާ ގުޅޭ މަޢުލޫމާތު ޗައިނާގެ ރައީސްއާ ޙިއްޞާކުރެއްވީ އަދީބު ކަމަށާއި، އޭނާ ދިރާސާތައް ކުރައްވައި އެއްބަސްވުމުގައި ސޮއިކުރެއްވި ކަމަށްވެސް އަދީބު ވިދާޅުވިއެވެ. ގިނަ ބަޔަކު ބްރިޖް އެޅޭނެކަމަށް ޤަބޫލުނުކުރި ނަމަވެސް، އަދީބު އެކަމާމެދު ޔަޤީންކަން ފާޅުކުރެއްވިއެވެ.
Advertisement
މީގެއިތުރުން، ބްރިޖްގައި ބައިސްކަލް އަދި ޖޮގިންގ މަގު ހިމެނުއްވުމަށް ނިންމެވީ ރައީސް ޔާމީން ކަމަށް އަދީބު ހާމަކުރެއްވިއެވެ. އަދި ބްރިޖްގެ ޑިޒައިނަކީ އިކޮނޮމިކް ކައުންސިލުން ފާސްކުރެއްވި ގޮތަށް ހުރި އެއްޗެއްކަންވެސް އަދީބު ވިދާޅުވިއެވެ.
އަދީބު އިތުރަށް ފާހަގަކުރެއްވި ގޮތުގައި ރައީސް ޑރ. މުޙައްމަދު މުޢިއްޒަކީ ބްރިޖްގެ މަޝްރޫޢުގައި މުހިންމު ދައުރެއް އަދާކުރެއްވި ބޭފުޅެކެވެ. އަދި ރައީސް ޑރ. މުޢިއްޒުގެ މައްޗަށް ތުހުމަތުކުރެވޭ ކަންކަމަކީ ޙަޤީޤަތާ ޚިލާފު ވާހަކަތަކެއްކަމަށްވެސް އަދީބު ވިދާޅުވިއެވެ.
