ދިވެހިރާއްޖޭގެ އިގްތިސާދީ ވިލުންވެރިކަން ވަރުގަދަކޮށް، އަންނަން އޮތް ޖީލުތަކުގެ މާލީ ރައްކާތެރިކަން ކަށަވަރުކުރުމަށްޓަކައި ތިމާވެއްޓާއި ރައްޓެހި ދެމެހެއްޓެނިވި އިންވެސްޓްމަންޓްތަކަށް އިސްކަންދޭންޖެހޭ ކަމަށް ޕެންޝަން އޮފީހުގެ ސީއީއޯ ޔަޒްމީދު މުހައްމަދު ވިދާޅުވެއްޖެއެވެ.
ޕެންޝަން އޮފީހާއި ޔޫއެންޑީޕީ ގުޅިގެން ދުސިތް ޑީ2 ފޭދޫ މޯލްޑިވްސްގައި މިއަދު ފެށި 13 ވަނަ "މޯލްޑިވްސް ފައިނޭންސް ފޯރަމް" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން ޔަޒްމީދު ވިދާޅުވީ، ރާއްޖޭގެ 80 އިންސައްތަ ރަށްތަކަކީ ކަނޑުގެ ލޮނުގަނޑަށްވުރެ އެއް މީޓަރު ތިރި ރަށްތަކެއް ކަމަށެވެ. މޫސުމީ ބަދަލުތަކުގެ ސަބަބުން މަސްވެރިކަމާއި ފަތުރުވެރިކަމަށް ކުރިމަތިވާ ގެއްލުންތަކާއެކު، ޕެންޝަން ކޮންޓްރިބިއުޝަނަށް ބުރޫއަރައި މާލީ ހިރާސްތައް އިތުރުވާނެތީ، ގައުމީ އިގްތިސާދު ވިލުންތެރިކުރުމަކީ ޕެންޝަން ފަންޑުގެ ދެމެހެއްޓެނިވިކަމަށް ކޮންމެހެން ބޭނުންތެރި ކަމެއް ކަމަށް އޭނާ ފާހަގަކުރެއްވިއެވެ.
30.3 ބިލިއަން ރުފިޔާގެ އެސެޓްސް މެނޭޖްކުރާ ރާއްޖޭގެ އެންމެ ބޮޑު އިންސްޓިޓިއުޝަނަލް އިންވެސްޓަރުގެ ހައިސިއްޔަތުން، ޕެންޝަން އޮފީހުން މަސައްކަތް ކުރަނީ ޕޯޓްފޯލިއޯ ސިންދަފާތުކޮށް ތިމާވެށްޓާއި ގުޅުންހުރި މަޝްރޫއުތަކަށް އިންވެސްޓްކުރުމަށް ކަމަށް ޔަޒްމީދު ވިދާޅުވިއެވެ. އެހެންނަމަވެސް، "ގްރީން އިންވެސްޓްމަންޓް" ގެ މާނައަކީ މާލީ އިންޒިބާތު ދޫކޮށްލުން ނޫން ކަމަށާއި، ކޮންމެ އިންވެސްޓްމަންޓަކީ ވެސް ހިރާސްތައް ވަޒަންކުރެވިފައިވާ، މެންބަރުންނަށް މާލީ ފައިދާ ލިބޭނެ ފަދަ އިންވެސްޓްމަންޓަކަށް ވާންޖެހޭނެ ކަމަށް އޭނާ ވިދާޅުވިއެވެ.
Advertisement
މީގެ އިތުރުން، ސިޔާސަތުތަކުގެ އިތުރުން އިންވެސްޓް ކުރެވޭ ފަދަ ހަރުދަނާ މަޝްރޫއުތަކާއި މާލީ އޮނިގަނޑުތައް ގާއިމުކުރުމަށް ސަރުކާރާއި މާލީ އިދާރާތައް ގުޅިގެން މަސައްކަތްކުރުމަށް ޔަޒްމީދު ވަނީ ގޮވާލައްވާފައެވެ.
