ތަރައްގީވަމުން އަންނަ ކުދި ޖަޒީރާ ގައުމުތަކުގެ (ސިޑްސް) ނާޒުކު ހާލަތަށް ބަލައި، ބައިނަލްއަގުވާމީ މާލީ ނިޒާމު ޒަމާނާއި އެއްގޮތަށް އިސްލާހުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ. ކޮޕް31 ގެ ހައި-ލެވެލް ބައްދަލުވުމުގައި ވާހަކަފުޅު ދައްކަވަމުން ރައީސް ވިދާޅުވީ، މިހާރު އޮތް މާލީ ނިޒާމުގެ ތެރެއިން ކުދި ގައުމުތަކަށް މޫސުމީ ފަންޑުތަކުން ފައިސާ ހޯދުމުގައި ބޮޑެތި ހުރަސްތަކެއް ކުރިމަތިވާ ކަމަށެވެ.
ބައިނަލްއަގުވާމީ މާލީ އިދާރާތަކާއި ކްރެޑިޓް ރޭޓިންގް އޭޖެންސީތަކުން މޫސުމީ މަޝްރޫއުތައް ވަޒަންކުރާ ގޮތް ބަދަލުކުރަން ޖެހޭ ކަމަށް ރައީސް ފާހަގަކުރެއްވިއެވެ. އެގޮތުން ތިމާވެށީގެ ވިލުންވެރިކަމަށް ކުރާ ހޭދައަކީ މާލީ ބުރައެއް ނުވަތަ ދަރަންޏެއްގެ ބަދަލުގައި، މުސްތަގުބަލަށް ކުރެވޭ އިންވެސްޓްމަންޓެއްގެ ގޮތުގައި ބަލައިގަތުމަށް އެމަނިކުފާނު އެދިވަޑައިގަތެވެ.
ރާއްޖެއަކީ މެދުފަންތީގެ އާމްދަނީ ލިބޭ ގައުމެއްގެ ގޮތުގައި ގިންތިކޮށްފައި އޮތުމުން، ލުއި ލޯނާއި ހިލޭ އެހީ ލިބުމުގައި ރާއްޖެއަށް ބޮޑެތި ދަތިތަކެއް ކުރިމަތިވެއެވެ. މިކަން ހައްލުކުރުމަށްޓަކައި އާމްދަނީގެ މައްޗަށް އެކަނި ބެލުމުގެ ބަދަލުގައި، ގައުމުތަކުގެ ތިމާވެށީގެ ނާޒުކުކަން ވަޒަންކުރާ "މަލްޓިޑައިމެންޝަނަލް ވަލްނަރަބިލިޓީ އިންޑެކްސް" (އެމްވީއައި) ބޭނުންކުރުމަށް ރާއްޖެއިން ދަނީ ބައިނަލްއަގުވާމީ މައިދާނުގައި ކެނޑިނޭޅި ވަކާލާތު ކުރަމުންނެވެ.
