އިސްރާއީލުން އިއްޔެ ޣައްޒާގެ އެކި ސަރަހައްދުތަކަށް ބޮން އަޅައި، ޣައްޒާ ސިޓީގައި މީހުން ގެދޮރު ދޫކޮށް ދިޔަ ސްކޫލަކަށް އާދީއްތަ ދުވަހު ދިން ބޮމުގެ ހަމަލާތަކުގައި ދިހަ އާންމުން މަރުވެ ދިހަވަރަކަށް މީހުން ޒަހަމް ވެސް ކޮށްލައިފިއެވެ.

ޣައްޒާ ސިޓީގެ ޢާންމު އެކި މަސްދަރުތަކުން ރިޕޯޓްކޮށްފައިވާ ގޮތުގައި އިސްރާއީލުގެ ފައިޓާ ޖެޓުތަކުން ގެދޮރު ގެއްލިފައިވާ މީހުން ދިރިއުޅޭ ޚާން ޔޫނިސްގެ ހުޅަނގުގައި އޮންނަ އަލް މަވާސީ ސަރަހައްދަށް ބޮން އަޅަައި ތިން ރައްޔިތަކު މަރުވެ، އިތުރު ބަޔަކު ޒަހަމްވެފައިވެ އެވެ.

މީގެ އިތުރުން އިސްރާއީލުގެ އިސްތިއުމާރީ ބާރުތަކުން ރަފާގެ އިރުމަތީ އަބޫ ހަލާވާ ސަރަހައްދަށް ބޮން އަޅައި ދެ ރައްޔިތަކު ޝަހީދު ކޮށްލާފައި ވެއެވެ.

ހަމައެހެންމެ ޣައްޒާގެ މެދުތެރޭގައި އޮންނަ އަލް ބުރެއިޖް ކޭމްޕްގެ އިރުމަތީގައި ބޮމެއް ގޮއްވާލައި، އެކަކު ޝަހީދުވެ، އިތުރު ބަޔަކު ޒަހަމްވެފައިވެ އެވެ.

އިސްރާއީލުގެ ފައިޓާ ޖެޓުތަކުން އަމާޒުކޮށްފައި ވަނީ ޣައްޒާ ސިޓީގެ އިރުދެކުނު ސަރަހައްދުގައި އޮންނަ އަލް ޒައިތޫން ސަރަހައްދުގައި ގެދޮރު ގެއްލިފައިވާ މީހުން ދިރިއުޅޭ ސަފާދު ސްކޫލަށެވެ. މިތަނުން 4 މީހުން ޝަހީދު ކޮށްލާފައި ވެއެވެ.

ސިވިލް ޑިފެންސް ކްރޫއިން ހާމަކުރި ގޮތުގައި ސްކޫލް ދޫކޮށްލި މީހުން އެތަން ދޫކޮށްލީ އެސަރަހައްދަށް ވެރިވެގަނެގެން އުޅޭ ސިފައިން އަނެއްކާވެސް ބޮން ގޮއްވާލާނެ ކަމުގެ އިންޒާރު ދިނުމުން ކަމަށާއި ފުރަތަމަ ބޮން ގޮއްވާލުމުން ޝަހީދުވި މީހުންނާއި ޒަޚަމްވި މީހުންގެ ހަށިގަނޑު ހޯދުމުގެ މަސައްކަތް ކުރިއަށްދާ ކަމަށެވެ.

އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ދިން ހަމަލާގައި ފަލަސްތީނުގެ ޝަހީދުވި މީހުންގެ އަދަދު 40،738 އަށް އަރާފައިވާއިރު، އިތުރު 94،154 މީހަކަށް އަނިޔާވެފައިވެ އެވެ. އޭގެ ތެރެއިން ގިނައީ އަންހެނުންނާއި ކުޑަކުދިންނެވެ.

ހަމަ އެ މަސްދަރުތަކުން ބުނާ ގޮތުގައި އިސްރާއީލުގެ އިސްތިއުމާރީ ބާރުތަކުން އެމްބިއުލާންސާއި ސިވިލް ޑިފެންސް ކްރޫންގެ ހަރަކާތްތަކަށް ހުރަސް އަޅަމުންދާއިރު، އިމާރާތްތަކުގެ ދަށުގައި ތާށިވެފައި ނުވަތަ ޝަހީދުވެފައިވާ މީހުންގެ ހަށިގަނޑުތައް އަދިވެސް ނުނެގި އެބަހުއްޓެވެ.