ހުރްމުޒް ކަނޑުއޮޅިން ދަތުރުކުރި ދެ ތެޔޮ ޓޭންކަރަކަށް ހަމަލާދީފި ކަމަށް ރިޕޯޓް ކޮށްފިއެވެ. ދުނިޔޭގެ ތެލުގެ ވިޔަފާރީގެ މައިގަނޑު އެއް މަގު ކަމަށްވާ ހުރްމުޒް ކަނޑުއޮޅިން ދަތުރުކުރަމުންދިޔަ ސާފުނުކުރާ ތެޔޮ އުފުލާ ދެ ޓޭންކަރެއް ކަނޑުގެ މައިންތަކެއްގައި ޖެހި، އޭގައި ވަނީ އަލިފާން ރޯވެފައި ކަމަށް އީރާނުގެ ރިވޮލިއުޝަނަރީ ގާޑުން ބުނެއެވެ.
ހާދިސާ ހިނގާފައިވަނީ މިދިޔަ ހުކުރު ދުވަހު ގަތަރުގެ އެލް.އެން.ޖީ އުޅަނދަކަށް ދިން ހަމަލާ ގަލްފުގެ ގައުމުތަކުން ވަރަށް ބޮޑަށް ކުށްވެރިކޮށްފައި ވަނިކޮށެވެ.
މި ހާދިސާއާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ސޯޝަލް މީޑިއާގައި ވިދާޅުވީ، އީރާނާއެކު ހިނގަމުންދާ ހަނގުރާމަ ކޮންމެވެސް އެއްގޮތަކުން "ވަރަށް އަވަހަށް" ނިމުމަކަށް އަންނާނެ ކަމަށެވެ. ޓްރަމްޕް ވަނީ އީރާނުން އެމެރިކާއާއެކު އެއްބަސްވުމަކަށް އައުމަށް އިންޒާރު ކުރައްވާފައެވެ. އަދި އީރާނުން އެއްބަސްވުމަކަށް ނައިސްފިނަމަ، އެމެރިކާއިން އަމިއްލައަށް އެ ހަނގުރާމަ އެއްކޮށް ނިންމާލާނެ ކަމަށް ވެސް ޓްރަމްޕް ވިދާޅުވިއެވެ.
Advertisement
މި ނުރައްކާތެރި ދަނޑިވަޅުގައި، އީރާނުގެ ޚާރިޖީ ވަޒީރު އައްބާސް އަރާގްޗީ ވިދާޅުވީ ހުރްމުޒް ކަނޑުއޮޅި އަލުން ހުޅުވާލުމަށްޓަކައި ދެ ދުވަހުގެ މަގުޗާޓަކަށް މެދުވެރިންނާއެކު މަޝްވަރާތައް ކުރިއަށްދާ ކަމަށެވެ. އަދި އެމެރިކާއިން ހަނގުރާމައިގެ ބަދަލުގައި ޑިޕްލޮމަސީ ނުވަތަ ވާހަކަދައްކައިގެން މައްސަލަ ހައްލުކުރުމުގެ މަގު އިޚްތިޔާރު ކުރާނެ ފަދަ "ބުއްދިއެއް" ހުންނާނެ ކަމަށް އުންމީދު ކުރައްވާ ކަމަށް ވެސް އީރާނުގެ ޚާރިޖީ ވަޒީރު ވިދާޅުވިއެވެ. ނަމަވެސް، އީރާނުން ކުރިން ވަނީ އެމެރިކާއާއެކު ކުރާ އާ ހަނގުރާމައެއް ކުރީގެ ހަނގުރާމަތަކަށްވުރެ ދިގުލައިގެން ހިނގައިދާނެ ކަމަށާއި، އެ ހަނގުރާމަ ނިމޭނެ ދުވަހެއް ނިންމާނީ ޓްރަމްޕް ނޫން ކަމަށް ބުނެ އިންޒާރުދީފައެވެ.
