އީރާނުން ހުށަހަޅާފައިވާ ހަތް ޝަރުޠު ފުރިހަމައަށް ޤަބޫލުނުކުރާހާ ހިނދަކު، އެ ޤައުމުގެ ނިއުކްލިއަރ މައްސަލައިގައި އަދި ހުޅަނގުގެ ޤައުމުތަކާއެކު ކުރިއަށްދާ މަޝްވަރާތަކުގައި އެއްވެސް ކުރިއެރުމެއް ނުހޯދޭނެ ކަމަށް އީރާނުން ހާމަކޮށްފިއެވެ.
އީރާނުގެ އިސް އޮފިޝަލުން މިކަން ހާމަކުރެއްވީ ވިލާތުގެ ޤައުމުތަކާއި އެމެރިކާއާއެކު އޮތް ގުޅުންތަކާއި، އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމާ ގުޅޭގޮތުން ވާހަކަދައްކަވަމުންނެވެ.
އީރާނުން ބުނެފައިވަނީ، ހުޅަނގުން ދައްކާ ވާހަކަތަކުގައި އިޚްލާޞްތެރިކަމެއް ހުރިނަމަ، އެ ޤައުމުން ހުށަހަޅާފައިވާ އަސާސީ ހަތް ޝަރުޠަށް އެއްބަސްވާންޖެހޭނެ ކަމަށެވެ. މި ޝަރުޠުތަކުގެ ތެރޭގައި މައިގަނޑު ގޮތެއްގައި ހިމެނެނީ އީރާނާ ދެކޮޅަށް އަޅާފައިވާ ހުރިހާ ޣައިރުޤާނޫނީ ދަތިކުރުމުގެ ފިޔަވަޅުތަކެއް އެއްކޮށް އުވާލުމާއި، އީރާނުގެ ސިޔާދަތާއި މިނިވަންކަމަށް އިޙްތިރާމްކުރުމުގެ އިތުރުން، އެއްބަސްވުންތަކާ އެއްގޮތަށް ޢަމަލުކުރާނެ ކަމުގެ ޔަޤީންކަން ދިނުމެވެ.
Advertisement
މީގެއިތުރުން، ކުރިން ވެފައިވާ އެއްބަސްވުންތަކުން އެމެރިކާ ފަދަ ޤައުމުތައް އެއްފަރާތްވެފައިވާ މާޒީއަށް އަލިއަޅުވާލައި، އީރާނުން ވަނީ ދެން ކުރިއަށްދާ އެއްވެސް މަޝްވަރާއެއްގައި މިފަދަ ކަންކަން ތަކުރާރު ނުވާނެކަމުގެ ޤާނޫނީ ގެރެންޓީ ބޭނުންވާނެ ކަމަށް ބަޔާންކޮށްފައެވެ. އަދި އީރާނުގެ ދިފާޢީ އަދި ސަރަޙައްދީ ޙައްޤުތަކަށް އެއްވެސް ފަރާތަކުން އަރައިގަނެވިގެން ނުވާނެ ކަމަށްވެސް އެ ޤައުމުން ވަނީ ބުނެފައެވެ.
އީރާނުގެ ޚާރިޖީ ދާއިރާގެ މަސްދަރުތަކުން ފާހަގަކުރާ ގޮތުގައި، ހުޅަނގުގެ ބާރުތަކުން ބޭނުންވަނީ އީރާނަށް އެއްވެސް މަންފާއެއް ނުލިބޭ ގޮތަށް ހަމައެކަނި އީރާނުގެ މައްޗަށް ޝަރުޠުތައް ލާށެވެ. ނަމަވެސް، މި ހަތް ޝަރުޠަކީ ޤައުމީ މަޞްލަޙަތު ޙިމާޔަތްކުރުމަށްޓަކައި ކޮންމެހެން ބޭނުންވާ ކަންކަން ކަމަށާއި، މި ކަންކަން ބަލައިނުގަނެ ޑިޕްލޮމެޓިކް ގޮތުން އެއްވެސް ކާމިޔާބީއެއް ޙާޞިލުނުކުރެވޭނެ ކަމަށް އީރާނުން ދެކެއެވެ.
