އިސްރާއީލުން ފަލަސްތީނުގެ އެކި ސަރަހައްދުގައި ހާއްސަކޮށް އުތުރާއި އިރުމައްޗަށް ދިން ހަމަލާ ތަކުގައި 60 އަށްވުރެ ގިނަ މީހުން ޝަހީދުކޮށްފިއެވެ. ގައްޒާގެ އުތުރުގައި ހުންނަ އަހްލީ އަރަބް ހޮސްޕިޓަލް ސަރަހައްދާއި އިރުމަތީގައި އޮންނަ އައްތޫފާ ސަރަހައްދާއި ޖަބަލިއްޔާ ރެފިއުޖީ ކޭމްޕްގެ އިރުމަތީ ސަރަހައްދަށް ވެސް ވައިގެ މަގުން ހަމަލާދީ އާޓިލަރީ ބޮން ގޮއްވާލާފައިވާއިރު އައްދުއްރާ ހޮސްޕިޓަލުގެ ވަށައިގެންވާ ސަރަހައްދަށް ފައިޓާ ޖެޓުތަކުން ހަމަލާ ދީފައި ވެއެވެ.

އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ފަލަސްތީނުގެ 40،691 މީހުން ޝަހީދު ކޮށްލާފައިވާއިރު، 94،060 އަށް ވުރެ ގިނަ މީހުން ޒަހަމްވެފައިވެ އެވެ.

މީގެ އިތުރުން، އިމާރާތްތަކުގެ ދަށުގައި މަދުވެގެން 10،000 މީހުން ތިބޭނެކަމަށް ބެލެވެއެވެ.

ފަލަސްތީނާއި ބައިނަލްއަގްވާމީ ޖަމިއްޔާތަކުން ބުނާ ގޮތުގައި ޝަހީދުވެ ޒަޚަމްވި މީހުންގެ ތެރެއިން ގިނައީ އަންހެނުންނާއި ކުޑަކުދިންނެވެ.

އިސްރާއީލުގެ އަނިޔާވެރިކަމުގެ ސަބަބުން ޣައްޒާގެ މުޅި ސަރަހައްދުން ގާތްގަނޑަކަށް ދެ މިލިއަން މީހުން ހާލުގައި ޖެހި ގެދޮރު ދޫކޮށް ގޮސްފައިވާއިރު، ގެދޮރު ދޫކޮށް ދިޔަ މީހުންގެ ބޮޑު ބައެއް ވަނީ މިސްރާ ބޯޑަރު ކައިރީގައި އޮންނަ ދެކުނުގެ ތޮއްޖެހިފައިވާ ސިޓީ ރަފާއަށް ހިޖުރަ ކޮށްފައެވެ. ޣައްޒާ ސިޓީގެ އިރުމަތީގައި އޮންނަ އައްތޫފާ އާއި ޣައްޒާގެ ދެކުނު ސަރަހައްދުގެ ރަފާއާ ދެމެދު އޮންނަ ދުރުމިނަކީ އެއްގަމު މަގުން ދަތުރުކުރާއިރު ގާތްގަނޑަކަށް 40 އާއި 45 ކިލޯމީޓަރު (ގާތްގަނޑަކަށް 25 އާއި 28 މޭލު) އެވެ.