ރާއްޖޭގައި ބައިނަލްއަގުވާމީ ޓްރާންޝިޕްމަންޓު ޕޯޓެއް ގާއިމްކުރުމުގެ ލަނޑުދަނޑި ހާސިލްކުރުމަށްޓަކައި ކުރަންޖެހޭ މަސައްކަތްތައް ބާރަށް ކުރިއަށްދާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި "ޚުލާސާ" ނޫހުގެ ނޫސްވެރިޔަކު ކުރި ސުވާލަކަށް ޖަވާބު ދެއްވަމުންނެވެ.
މިނިސްޓަރު ސައީދު ވިދާޅުވީ، އިންޓަނޭޝަނަލް ޕޯޓްގެ މަސައްކަތް ތަރައްގީކޮށް ކުރިއަށް ގެންދިއުމަށްޓަކައި ވާންޖެހޭ އެންމެހައި ތައްޔާރީތައް މިހާރު ދަނީ ވަމުންނެވެ. އަދި މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުހިންމު ރިޔާސީ ވައުދެއްކަން ފާހަގަކުރައްވަމުން، އެ ވައުދު ފުއްދުމަށް ކުރަންޖެހޭ ކޮންމެ ކަމެއް ސަރުކާރުން ކުރާނެ ކަމުގެ ޔަގީންކަން މިނިސްޓަރު ދެއްވިއެވެ. މީގެއިތުރުން، ރައީސް ޑރ. މުއިއްޒު ވަނީ އެމަނިކުފާނު ވެވަޑައިގެންނެވި ހުރިހާ ވައުދުތަކެއް ފޮތެއްގެ ސިފައިގައި ޗާޕުކުރައްވާފައި ކަމަށާއި، ޓްރާންޝިޕްމަންޓް ބަނދަރެއް ގާއިމްކުރުމަކީ އޭގެ ތެރޭގައި ހިމެނޭ މުހިންމު އެއް ކަންތައް ކަމަށް ވެސް ވިދާޅުވިއެވެ.
Advertisement
"އެތައް އޮޕްޝަނެއް ހޯދައިގެން، އިރާދަކުރެއްވިއްޔާ މި ފަސް އަހަރުގެ ދައުރުގެ ތެރޭގައި އެ ލަނޑުދަނޑި ހާސިލްކުރުމަށްޓަކައި ވަރަށް އަވަހަށް އަޑުއަހާލެވޭ ހިސާބަށް ކަންކަން ގެނެވޭނެ،"
އިކޮނޮމިކް މިނިސްޓަރު މުހައްމަދު ސައީދު
މީގެއިތުރުން، މާލޭ ވިޔަފާރި ބަނދަރު ބޮޑު ތަރައްގީއަކާއެކު ތިލަފުއްޓަށް ބަދަލުކުރުމުގެ އަމަލީ މަސައްކަތަށް އަލިއަޅުވާލަމުން ސައީދު ވިދާޅުވީ އާ ވިޔަފާރި ބަނދަރާއެކު އެތަން ވެގެންދާނީ ހަމައެކަނި މާލެ އާއި ކޮލަމްބޯއާ ދެމެދު އޮންނަ ޝަޓްލް ދަތުރުތަކަކަށް އެކަނި ނޫން ކަމަށެވެ. މިހާރު ގިނަ ފަހަރަށް ރާއްޖެއަށް މުދާ ގެންނަން ޖެހެނީ ކޮލަމްބޯއަށް ގެންދިއުމަށްފަހު، އެތަނުން މާލެއަށް ފެރީކޮށްގެން ކަމަށްވިޔަސް، މި ނިޒާމަށް ބަދަލު އަންނާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ސައީދު އިތުރަށް ވިދާޅުވީ، ތިލަފުށްޓަށް ޕޯޓް ބަދަލުވުމުން ވިޔަފާރިއާއި އިގްތިސާދީ ދާއިރާއަށް ވަރަށް ގިނަ ހެޔޮ ބަދަލުތަކެއް އަންނާނެ ކަމަށެވެ. އަދި ރާއްޖޭގައި ގާއިމްކުރެވޭ ޓްރާންޝިޕްމަންޓް ޕޯޓާއެކު، ހަގީގީ މާނައިގައި މެރިޓައިމް އިގްތިސާދެއް ބިނާކުރުމަށް ސަރުކާރުން ކުރަމުންދާ މަސައްކަތްތަކުގެ ފޮނި ނަތީޖާ ދިވެހި ރައްޔިތުންނަށް ފެނިގެންދާނެ ކަމަށް ވެސް މިނިސްޓަރު ވިދާޅުވިއެވެ.
