ހުތުބާ: މުދަލާއި ޝަރަފަށް އޮންނަ ދަހިވެތިކަމަކީ އިންސާނާގެ ދީންވެރިކަން ފަސާދަކޮށްލާ ނުރައްކާތެރި ކަމެއް

މުދަލާއި ޝަރަފަށް އޮންނަ ދަހިވެތިކަމުގެ ސަބަބުން އިންސާނާގެ ދީންވެރިކަމަށް ލިބޭ ގެއްލުމާއި ފަސާދަ ނުހަނު ބޮޑު ކަމަށާއި، ނަހަމަ ގޮތުގައި މުދާ ހޯދުމަކީ އިލާހީ އަމާނާތަށް ވެވޭ ބޮޑު ހިޔާނާތެއް ކަމަށް މިއަދުގެ ހުކުރު ހުތުބާގައި ވިދާޅުވެއްޖެއެވެ.

ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ހުތުބާގައި ބަޔާންކުރައްވާފައިވަނީ، ބަކަރި އައިނެއްގެ ތެރެއަށް ހައިވެފައިވާ މިނިކާ ދެ ކުއްތާ ދޫކޮށްލުމުން އެ ތަކެއްޗަށް ދޭ ގެއްލުމަށް ވުރެ، މުދަލާއި ޝަރަފަށް އޮންނަ ދަހިވެތިކަމުގެ ސަބަބުން އިންސާނާގެ ދީނަށް ލިބޭ ގެއްލުން މާ ބޮޑު ކަމަށް މާތް ނަބިއްޔާ ﷺ ޙަދީޘްކުރައްވާފައިވާ ކަމަށެވެ. އަދި މުދަލަށް އޮންނަ ލޯބި އޭގެ އިމުން ބޭރުވެއްޖެ ނަމަ، އިންސާނާގެ ދީން ހަލާކުވެ، އަހުލާގު ފަސާދަވެ، ﷲއާ އޮންނަ ގުޅުން ކެނޑިގެންދާނެ ކަމަށް ހުތުބާގައި ފާހަގަކުރެއްވިއެވެ.

ހުތުބާގައި އިތުރަށް ބުނީ، ކާއިނާތުގައިވާ އެންމެހައި ތަކެއްޗަކީ މާތް ﷲގެ ފުރިހަމަ މިލްކުވެރިކަމުގެ ދަށުގައިވާ ތަކެތި ކަމަށާއި، އިންސާނުންގެ އަތްމަތީގައިވާ މުދަލަކީ ވަގުތީ ގޮތުން ހަވާލުކުރެވިފައިވާ އިމްތިހާނެއް ކަމަށެވެ. އެހެންކަމުން، މުދާ ހޯދި ގޮތާއި އެ މުދާ ހޭދަކުރި ގޮތާ މެދު ގިޔާމަތް ދުވަހު މާތް ﷲގެ ހަޟުރަތުގައި ޖަވާބުދާރީވާން ޖެހޭނެ ކަމަށް ހަނދާންކޮށްދެއްވިއެވެ.

އިސްލާމްދީނުގައި އެންމެ ބޮޑަށް ނަހީކުރައްވާފައިވާ އެއް ކަމަކީ ހަރާމް ގޮތުގައި އާމްދަނީ ހޯދުންކަން ފާހަގަކުރައްވައި ހުތުބާގައި ވިދާޅުވީ، ރިބާ ކެއުމާއި، ރިޝްވަތާއި، މަކަރާއި ހީލަތް ހެދުމާއި، ވައްކަމާއި، ޖުވާ އަދި އަމާނާތަށް ހިޔާނާތްތެރިވުން ފަދަ ނަހަމަ ގޮތްތަކުން ފައިސާ ހޯދުމަކީ މާތް ﷲ ކަނޑައެޅިގެން ހަރާމްކުރައްވާފައިވާ ކަންކަން ކަމަށެވެ. އަދި ހަރާމް ތަކެތި ކައިގެން ހެދިބޮޑުވާ ކޮންމެ ހަށިގަނޑަކަށް އެންމެ އައުލާކަން ބޮޑީ ނަރަކައިގެ އަލިފާން ކަމުގެ ވަރުގަދަ އިންޒާރު ވެސް ވަނީ ދެއްވާފައެވެ.

ހަމައެއާއެކު، ތެދުވެރިކަމާއެކު އަދާކުރާ ވަޒީފާއިންނާއި ހުއްދަ ވިޔަފާރިން ހަލާލު އާމްދަނީ ހޯދުމަށް ބާރުއަޅުއްވައި، އަމިއްލަ އަނބިދަރިންނަށާއި މައިންބަފައިންނަށް ހޭދަކުރުމުގެ މަތިވެރިކަން ހުތުބާގައި ފާހަގަކުރެއްވިއެވެ. އަދި މުދަލުން ދައްކަންޖެހޭ ފަރުޟު ޒަކާތް އަދާކުރުމަށާއި، ބޭކާރު ގޮތުގައި މުދާ އިސްރާފުކުރުމުން ދުރުހެލިވެ، މާތް ﷲ ރުހިވޮޑިގަންނަވާ މަގުގައި މުދާ ހޭދަކުރުމަށް މިއަދުގެ ހުތުބާގައި އެންމެހައި މުސްލިމުންނަށް ވަނީ ގޮވާލައްވާފައެވެ.