ގްރޭޓަރ މާލެ ސަރަހައްދުގެ ތޮއްޖެހުމާއި ޓްރެފިކް މައްސަލަ ހައްލުކުރުމަށްޓަކައި ޓްރެފިކް ލައިޓް ހަރުކުރުމާއި، ކާރުބާރު ބޮޑުވާ ވަގުތުތަކަށް ހާއްސަ ބަސްތަކެއް ތައާރަފުކުރުމުގެ އިތުރުން ވެހިކަލް ރަޖިސްޓްރީ ކުރުން ކޮންޓްރޯލް ކުރުމުގެ އިތުރު މަސައްކަތްތަކެއް ސަރުކާރުން ރާވަމުން އަންނަކަން ހާމަކޮށްފިއެވެ.
މިކަން ހާމަކުރެއްވީ ސަރުކާރުން ރައްޔިތުންނާ ބައްދަލުކޮށް ސުވާލުތަކަށް ޖަވާބު ދިނުމަށް ބޭއްވި "އަހާ" ފޯރަމްގައި، މާލޭގެ ޓްރެފިކް ތޮއްޖެހުމާ ގުޅޭގޮތުން އާންމު ރައްޔިތަކު ކުރި ސުވާލަކަށް ޖަވާބު ދެއްވަމުން މިނިސްޓަރ މުހައްމަދު ސައީދެވެ.
މިނިސްޓަރ ސަޢީދު ވިދާޅުވީ މާލޭގެ މަގުތަކުގައި ވެހިކަލްތައް ގިނަވެފައިވާ މިންވަރަކީ އެންމެންނަށް ވެސް ފެންނަން އޮތް ހަގީގަތެއް ކަމަށާއި، މާލެ ސަރަހައްދަކީ ވެހިކަލް ރަޖިސްޓްރޭޝަން ކޮންޓްރޯލް ކުރެވޭ ޒޯނަކަށް ހެދީ ވެސް އެ ސަބަބަށްޓަކައި ކަމަށެވެ. އަދި ރައީސުލްޖުމްހޫރިއްޔާ މިކަމަށްޓަކައި ހާއްސަ އޮފީހެއް އުފެއްދެވީ މި ސަބަބައްޓަކައި ކަމަށް މިނިސްޓަރު ވިދާޅުވިއެވެ.
Advertisement
އަދަދުތަކަށް އަލިއަޅުއްވާލައްވަމުން މިނިސްޓަރ ވިދާޅުވީ، ގްރޭޓަރ މާލެ ސަރަހައްދުގެ މަގުތަކުގެ 82 ޕަސެންޓު މިހާރު އޮތީ ވެހިކަލްތަކުން ފުރިފައި ކަމަށެވެ. އެގޮތުން މި ސަރަހައްދުގައި 130،806 އުޅަނދު ރަޖިސްޓްރީ ކޮށްފައިވާއިރު، އޭގެ ތެރޭގައި 140،911 ކާރާއި 115،895 ސައިކަލު ހިމެނޭކަން ފާހަގަކުރެއްވިއެވެ. މިއީ ހައްލުކުރަން ފަސޭހަ މައްސަލައެއް ނޫން ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޗައިނާ ސަރުކާރާއެކު މާލޭގެ މަގުތައް ޒަމާނީ ފެންވަރަށް ތަރައްގީކުރުމަށް ނިންމެވި ނިންމެވުމަކީ މިކަމަށް ލިބޭނެ ބޮޑު ހައްލެއް ކަމަށް މިނިސްޓަރު ވިދާޅުވިއެވެ.
މީގެއިތުރުން، ވެހިކަލް ރަޖިސްޓްރޭޝަނާއި ލައިސަންސް ފީގެ ގޮތުގައި އަހަރަކު ގާތްގަނޑަކަށް 200 މިލިއަން ރުފިޔާ މާލެ ސިޓީ ކައުންސިލަށް ލިބޭއިރު، އެ ފައިސާއިން މި މައްސަލަ ހައްލުކުރުމަށް އެކަށީގެންވާ މަސައްކަތްތަކެއް ކުރެވިފައި ނުވާކަން މިނިސްޓަރު ފާހަގަކުރެއްވިއެވެ. އެހެންކަމުން، މާލެއަކީ ރަޖިސްޓްރޭޝަން ކޮންޓްރޯލް ޒޯނަކަށް ހަދައި، އެކަމަށް އުފެއްދި ޚާއްޞަ އޮފީހުގެ ދަށުން އެ ފަންޑަކީ ހަމައެކަނި ޓްރެފިކް މައްސަލަތައް ހައްލުކުރުމަށް ޚަރަދުކުރެވޭ ފަންޑަކަށް ހެދުން މާ މުހިންމު ކަމަށް ވިދާޅުވިއެވެ.
ޓްރެފިކް ތޮއްޖެހުން ކުޑަކުރުމަށް ސަރުކާރުން ރާވާފައިވާ އިތުރު ފިޔަވަޅުތަކުގެ ތެރޭގައި، ކާރުބާރު ބޮޑުވާ ސަރަހައްދުތަކާއި ހަތަރު އަނގޮޅި ކަންމަތިތަކުގައި ޓްރެފިކް ލައިޓް ހަރުކުރުމާއި ފުލުހުންގެ ހަރަކާތްތެރިވުން އިތުރުކުރުން ހިމެނޭ ކަމަށް މިނިސްޓަރު ވިދާޅުވިއެވެ.
ހަމައެއާއެކު، އޮފީސްތަކާއި ސްކޫލްތައް ފެށޭ އަދި ނިމޭ ވަގުތުތަކުގައި ހުޅުމާލެއިން މާލެއަށް އަދި މާލެއިން ހުޅުމާލެއަށް ދަތުރުކުރާ ފަރާތްތަކަށް ހާއްސަކޮށްގެން ވަކި ބަސްތަކެއް ބޭއްވުމަށާއި، ދަރިވަރުން އުފުލުމަށް ހާއްސަ "ފްރެންޑްލީ ބަސް" ތަކެއް މާލެއާއި ހުޅުމާލެ ފޭސް 1 އަދި ފޭސް 2 އާ ދެމެދު ދަތުރުކުރާނެ އިންތިޒާމު ހަމަޖެއްސުމަށް ސަރުކާރުން ނިންމާފައިވާ ކަމަށް މިނިސްޓަރ ސައީދު ވިދާޅުވިއެވެ.
