އުސް އިމާރާތްތަކުގެ 15 ވަނަ ބުރިއާ ހަމައަށް ވާސިލްވެ، އަލިފާން ނިއްވުމުގެ ގާބިލުކަން ލިބިފައިވާ ޒަމާނީ ފަޔަރ ޓްރަކްތަކާއި ބައުޒަރުތައް ރާއްޖެ ގެނައުމަށް ސަރުކާރުން ނިންމައިފިއެވެ.
މިކަން ހާމަކުރެއްވީ ސަރުކާރުގެ މިނިސްޓަރުންނާ ސުވާލު ކުރުމަށް ބޭއްވި "އަހާ" ފޯރަމްގައި އާންމު ރައްޔިތަކު ކުރި ސުވާލަކަށް ޖަވާބު ދެއްވަމުން ޑިފެންސް މިނިސްޓަރު ހަސަން ރަޝީދެވެ.
މިނިސްޓަރު ވިދާޅުވީ، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) މެދުވެރިކޮށް މި އުޅަނދުތައް ގެނައުމުގެ މަސައްކަތް ސަރުކާރުން ކުރިއަށް ގެންދާ ކަމަށެވެ. އަދި މި ގެންނަ ވަސީލަތްތަކަކީ އުސް އިމާރާތްތަކުގައި ހިނގާ އަލިފާނުގެ ހާދިސާތައް ކޮންޓްރޯލް ކުރުމަށް ހާއްސަ، 15 ވަނަ ބުރިއާ ހަމައަށް ވާސިލްވުމުގެ ފުރިހަމަ ގާބިލުކަން ލިބިގެންވާ އުޅަނދުތަކެއް ކަމަށްވެސް މިނިސްޓަރު ފާހަގަކުރެއްވިއެވެ.
Advertisement
މީގެއިތުރުން ހުޅުމާލޭގެ ހިޔާ ޓަވަރުތަކަކީ ވަރަށް އާބާދީ ބޮޑު ސަރަހައްދެއްކަން ފާހަގަކުރައްވައި މިނިސްޓަރު ވިދާޅުވީ، އެ ސަރަހައްދުގައި ދިރިއުޅޭ ރައްޔިތުން އަލިފާނުގެ ނުރައްކާތެރި ހާދިސާތަކުން ރައްކާތެރިކުރުމަށްޓަކައި ހޭލުންތެރިކުރުމުގެ ޕްރޮގްރާމްތައް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) މެދުވެރިކޮށް ކުރިއަށް ގެންދިއުމަށް ނިންމާފައިވާ ކަމަށެވެ.
މި ފިޔަވަޅުތަކަކީ ރާއްޖޭގައި އުސް އިމާރާތްތައް އިތުރުވަމުން އަންނާތީ، އަލިފާނުގެ ހާދިސާތަކުން ރައްޔިތުންގެ ފުރާނައާއި މުދާ ސަލާމަތްކުރުމަށް ދިފާއީ ބާރުތަކުގެ ގާބިލުކަން އިތުރުކުރުމަށް ސަރުކާރުން އަޅަމުންދާ މުހިންމު ފިޔަވަޅެކެވެ.
