މާލޭގެ މަގުތަކުގައި ބޮޑެތި އުޅަނދުތައް (ހެވީ ވެހިކަލް) ދުއްވުމާއި މުދާ އަރުވާ ބޭލުމުގެ ސަބަބުން ކުރިމަތިވާ ތޮއްޖެހުމުގެ މައްސަލައަށް ވަރަށް އަވަހަށް އެދެވޭ ހައްލެއް ގެނެސް، އެކަން ތަންފީޒު ކުރައްވާނެ ކަމަށް ދަތުރުފަތުރާ ބެހޭ މިނިސްޓަރު މުހައްމަދު ސައީދު ވިދާޅުވެއްޖެއެވެ.
މިނިސްޓަރު މިހެން ވިދާޅުވީ ޕީއެސްއެމް މެދުވެރިކޮށް ސަރުކާރުން ކުރިއަށް ގެންދާ "އަހާ" ފޯރަމްގައި، ޔޫސުފް ނަމަކަށް ކިޔާ 9 އަހަރުގެ ކުޑަކުއްޖަކު ކުރި ސުވާލަކަށް ޖަވާބު ދެއްވަމުންނެވެ.
މިނިސްޓަރު ވިދާޅުވީ، މާލެއަކީ މޮބިލިޓީއަށް ބެލި ނަމަވެސް އަދި ވެހިކަލް ކޮންސެންޓްރޭޝަނަށް ބެލި ނަމަވެސް ވަރަށް ބޮޑަށް ކާރުބާރު ބޮޑު ތަނެއް ކަމަށެވެ. އަދި ދާދި ފަހުން އެއްގަމު ދަތުރުފަތުރާ ބެހޭ ގާނޫނެއް ފާސްވެގެން އައިސްފައިވާކަން ފާހަގަކުރައްވައި މިނިސްޓަރު ވިދާޅުވީ، އެ ގާނޫނު އެންމެ ފުރިހަމައަށް ތަންފީޒުވެގެން ދިޔުމަކީ ސަރުކާރެއްގެ ކާމިޔާބީ އަދި ނާކާމިޔާބީއާ ގުޅިފައިވާ މުހިންމު ކަމެއް ކަމަށެވެ.
Advertisement
ސްކޫލް ކުދިންނާއި އާންމު ރައްޔިތުންގެ މޫވްމަންޓަށް ބަލާއިރު، ހެވީ ވެހިކަލްތައް ބޭނުންކުރުމުގައްޔާއި މުދާ އަރުވާ ބޭލުމުގައި އެންމެ ބޮޑު އިސްކަމެއް ދޭންވާނީ ރައްޔިތުންގެ ރައްކާތެރިކަމާއި ސަލާމަތަށް ކަމަށް މިނިސްޓަރު ވިދާޅުވިއެވެ. ހާއްސަކޮށް، ސްކޫލް ގަޑިތަކުގައި މިފަދަ ބޮޑެތި އުޅަނދުތައް މަގުތަކަށް ނުކުތުމުން ސްކޫލް ދަރިވަރުންނާއި ބެލެނިވެރިންގެ އިތުރުން އޮފީސްތަކަށް ދާ މުވައްޒަފުންނަށްވެސް ބޮޑެތި ތަކުލީފުތަކަކާ ކުރިމަތިލާން ޖެހޭކަން ފާހަގަކުރެއްވިއެވެ.
މީގެއިތުރުން، މި މައްސަލައާ ގުޅިގެން ވަރަށް ގިނަ ވިޔަފާރިވެރިންނާ މަޝްވަރާ ކުރައްވާފައިވާ ކަމަށް މިނިސްޓަރު ވިދާޅުވިއެވެ. މީގެކުރިންވެސް މުދާ އަރުވާ ބާލާ ގަޑިތަކެއް ކަނޑައަޅައި ކޮންޓްރޯލް ކުރުމުން ވިޔަފާރިވެރިންގެ ވަރަށް ގިނަ ޝަކުވާތައް އައި ކަމަށާއި، މިފަދަ ކަންކަމުގައި ހުރިހާ ފަރާތްތަކެއް ސައްތައިން ސައްތަ ހިތްހަމަޖެހޭ ފަދަ ހައްލެއް ނާންނާނެ ކަމަށް ވިދާޅުވިއެވެ.
ނަމަވެސް، ރައްޔިތުންގެ ލާބަޔާއި މަންފާއަށްޓަކައި ސަރުކާރުން ކުރަންޖެހޭ ކަންކަން ފަސްޖެހުމެއް ނެތި ކުރައްވާނެ ކަމަށާއި، ވިޔަފާރިވެރިން ހިމެނޭހެން އެކި ފަރާތްތަކުގެ ކޮންސަލްޓޭޝަނަށް ފަހު، މިކަމަށް އެދެވޭ އަވަސް ހައްލެއް ވަރަށް އަވަހަށް ތަންފީޒު ކުރަން ފަށްޓަވާނެ ކަމުގެ ޔަގީންކަން މިނިސްޓަރު ދެއްވިއެވެ.
