މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ދާއިމީ ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމުގެ މަގުސަދުގައި ކުރިއަށްގެންދާ ގައުމީ ފެންވަރުގެ މަޝްރޫއު "ޕްރޮޖެކްޓް ބައޯކަލޯ: ރައްކާތެރި، ސާފުތާހިރު އަދި އޯގާތެރި މުޖުތަމައެއް" ހުޅުމާލޭގައި މިއަދު ރަސްމީކޮށް އިފްތިތާހުކޮށްފި އެވެ.
މިއީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއާއި، ޖަނަވާރުންގެ ހިމާޔަތުގައި މަސައްކަތްކުރާ ފަރާތްތަކުގެ އިތުރުން މަދަނީ ޖަމިއްޔާތަކާއި ކަމާބެހޭ އިދާރާތައް ގުޅިގެން ކުރިއަށްގެންދާ މުހިންމު މަޝްރޫއެކެވެ.
މަސްވެރިކަމާއި ބެހޭ ވުޒާރާއިން ބުނީ، "ބައޯކަލޯ" ނުވަތަ "ބައުކާލޯ" މި ނަމަކީ ދިވެހި ފޯކްލޯރުގައި ބިރުވެރިކަމާ ގުޅުވައިގެން ބޭނުންކުރަމުން އައި ނަމެއް ނަމަވެސް، މި މަޝްރޫއުގެ ތެރެއިން އެ ނަމަށް އައު މާނައެއް ދެވިފައިވާ ކަމަށެވެ. އެގޮތުން މިއީ އޯގާތެރިކަމާއި، ޒިންމާދާރުކަމާއި، ރައްކާތެރިކަން އަދި މުޖުތަމައަށް ފައިދާހުރި ހަރަކާތެއްގެ ރަމްޒެއްގެ ގޮތުގައި ވަނީ ކަނޑައަޅާފަ އެވެ.
Advertisement
މި މަޝްރޫއާ ގުޅޭގޮތުން ވަޒީރު އަހުމަދު ޝިޔާމް ވިދާޅުވީ، މުޅި ރާއްޖެއަށް ފުޅާކުރެވޭނެ ނަމޫނާ ނިޒާމެއް ބިނާކުރުމަށް ފެށި މި މަޝްރޫއުގެ ސަބަބުން، ބުޅަލާމެދު މުޖުތަމައު ދެކޭގޮތް ވަރަށް ބޮޑަށް ބަދަލުވެގެންދާނެ ކަމަށް އުންމީދުކުރައްވާ ކަމަށެވެ. އަދި ބުޅަލަށް ބޭނުންވާ ހިޔާވަހިކަމާއި ފަރުވާ ދިނުމަށް ވުޒާރާގެ ވެޓެރިނަރީ ހިދުމަތްތަކާއި "އޮޅުހިޔާ" ޝެލްޓާގެ ހާލަތު ރަނގަޅުކުރުމަށް މުހިންމު މަސައްކަތްތަކެއް ކުރެވެމުންދާ ކަމަށްވެސް ވަޒީރު ފާހަގަކުރެއްވި އެވެ.
ހުޅުމާލޭގައި ޕައިލެޓް ޕްރޮޖެކްޓެއްގެ ގޮތުގައި ފެށި މި މަޝްރޫއުގެ ދަށުން، އިންސާނީ އުސޫލުތަކާ އެއްގޮތަށް ބުޅާ ދަރިމައިވުން ހުއްޓުވުމަށް "ޓްރެޕްނިއުޓާރިޓާން" (ޓީއެންއާރް) ޕްރޮގްރާމް ހިންގުމަށް ވަނީ ހަމަޖެހިފަ އެވެ. މީގެއިތުރުން ވެޓެރިނަރީ ފަރުވާ ދިނުމާއި، ޒިންމާދާރުކަމާއެކު ކާނާ ދިނުމުގެ އާދަ އަށަގެންނެވުމާއި، ބުޅާ އެޑޮޕްޓްކުރުމަށް ބާރުއެޅުމުގެ އިތުރުން "ކެޓް ސޭފް ޕާކް" ތައް ގާއިމުކުރުމާއި، ކުޑަކުދިންނާއި ޒުވާނުންނަށް ހާއްސަ ހޭލުންތެރިކުރުމުގެ ގިނަ ހަރަކާތްތަކެއް ކުރިއަށް އޮތް އަހަރުގެ ތެރޭގައި ހިންގުމަށް ވަނީ ރޭވިފަ އެވެ.
ޖަނަވާރުންގެ ހިމާޔަތާއި ރައްކާތެރިކަން ކަށަވަރުކުރުމަކީ ސަރުކާރުން ހާއްސަ އިސްކަމެއް ދެއްވާ ކަމެކެވެ. އެގޮތުން މަގުމަތީގައި އުޅޭ ޖަނަވާރުންގެ މައްސަލައަށް ދާއިމީ ހައްލެއް ހޯދުމަށް ރިޔާސީ ބަޔާނުގައި އަލިއަޅުއްވާލައްވާފައިވާއިރު، "ޖަނަވާރުންގެ ހިމާޔަތާއި ރައްކާތެރިކަމުގެ ޤާނޫނު"ގެ ދަށުން މިހާރު ވަނީ ޖަނަވާރުންގެ ވެލްފެއާއާ ގުޅޭ ޤައުމީ ހަރުދަނާ އޮނިގަނޑެއް އެކުލަވާލެވިފަ އެވެ.
