ޕެންޝަން އޮފީހުން ސިލްސިލާކޮށް ބާއްވަމުން އަންނަ "ތްރީ ޖެނެރޭޝަން ވޯކް" (3ޖެން ވޯކް) ގެ މިއަހަރުގެ ހަތަރުވަނަ އެޑިޝަން ހދ. ހަނިމާދޫގައި ބޭއްވުމަށް ހަމަޖައްސައިފިއެވެ. 2026 އޮކްޓޯބަރު 17 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ މި ހަރަކާތަކީ މުޅި އާއިލާއަށް ހާއްސަކޮށްގެން ކުރިއަށްގެންދާ ހިނގާލުމެކެވެ.
މި ހަރަކާތުގެ މައިގަނޑު މަގްސަދަކީ ދުޅަހެޔޮ ސިއްހަތެއްގައި ތިބުމަށް ބާރުއެޅުމާއެކު، ފަހަށް ފައިސާ ރައްކާކުރުމާއި، އިންވެސްޓްކުރުމާއި، އަދި ރިޓަޔަރމަންޓަށް ތައްޔާރުވުމުގެ މުހިންމުކަމާމެދު އާއިލާގެ ހުރިހާ މެންބަރުންގެ މެދުގައި ހޭލުންތެރިކަން އުފެއްދުމެވެ. މި ހިނގާލުމުގެ އެންމެ ހާއްސަ އެއް ބަޔަކީ އެއް އާއިލާއެއްގެ ތިން ޖީލެއްގެ މެންބަރުން އެކުގައި ބައިވެރިވެގެން ކުރިއަށްގެންދާ 1 ކިލޯމީޓަރުގެ ރަމްޒީ ހިނގާލުމެވެ. މިއީ މާލީ ރައްކާތެރިކަން ހޯދުމަކީ މުޅި އުމުރުދުވަހަށް ދެމިގެންދާ ދަތުރެއްކަން ރަމްޒުކޮށްދޭ ހަރަކާތެކެވެ.
މި ހިނގާލުމަށްފަހު، ހުރިހާ އުމުރުފުރައެއްގެ ބައިވެރިންނަށްވެސް ބައިވެރިވެވޭނެ ފަދަ އުފާވެރި އާއިލީ ހަވީރެއް އޮންނާނެއެވެ. މި ހަވީރުގައި ކުޑަކުދިންނާއި ބޮޑެތިމީހުންނަށް ހާއްސަ ތަފާތު ކުޅިވަރުތަކާއި، ސަގާފީ ހަރަކާތްތަކާއި، މައުލޫމާތު ފޯރުކޮށްދޭ ސްޓޯލްތަކާއި ފުޑް ކޯޓުތައް ހިމެނޭނެއެވެ.
Advertisement
މިފަދަ ހަރަކާތްތަކުގެ ސަބަބުން އާއިލާގެ އެކި ޖީލުތަކުގެ މެދުގައި އޮންނަ ގުޅުން ބަދަހިވެ، އެކުގައި އުފާވެރި ވަގުތުތަކެއް ހޭދަކުރުމުގެ ފުރުސަތު ލިބިގެންދާނެ ކަމަށް ޕެންޝަން އޮފީހުން ފާހަގަކުރެއެވެ.
