އިސްރާއީލުގެ އިސްތިއުމާރީ ބާރުތަކުން ހުޅަނގު އައްސޭރީގައި ދިރިއުޅޭ ފަލަސްތީނުގެ ބަދަވީންނަށް ސާފު ބޯފެން ލިބުމަށް ހުރަސްތަކެއް އަޅައި، އެ މީހުންގެ ދިރިއުޅުމަށް ބޮޑު ނުރައްކަލެއް ކުރިމަތިކޮށްފިއެވެ.
އިސްރާއީލު ސިފައިން ވަނީ ބަދަވީންނަށް ފެން ފޯރުކޮށްދޭ މަގުތަކާއި، ފެން ވަޅުތަކަށް ދެވޭނެ މަގުތައް ވެސް ބަންދުކޮށް، ވަކި ހުރަސްތަކެއް ޖަހާފައެވެ. މިކަމުގެ ސަބަބުން ކުޑަކުދިންނާއި އާއިލާތަކަށް ބޭނުންވާ ޒަރޫރީ ފެން ނުލިބި، ދަނޑުވެރިކަމާއި ގެރިބަކަރި ގެންގުޅުމަށް ބަރޯސާވެފައިވާ މި މީހުންގެ ދިރިއުޅުން ވަނީ ހުއްޓުމަކަށް އައިސްފައެވެ.
ހުޅަނގު އައްސޭރީގެ އެކި ސަރަހައްދުތަކުގައި ފަލަސްތީނު ރައްޔިތުންނަށް ދަތިކުރުމުގެ ގޮތުން އިސްރާއީލުން މިފަދަ ހުރަސްތައް ގާއިމުކުރަމުން ދަނީ އެމީހުންގެ އަމިއްލަ ބިމުން ނެރެ، ޔަހޫދީ އާބާދީތައް ފުޅާކުރުމުގެ ނުބައި މަގުސަދުގައެވެ. ފެނާއި އެހެނިހެން އަސާސީ ޚިދުމަތްތައް ކަނޑާލައިގެން ފަލަސްތީނު މީހުން އެ ސަރަހައްދުތަކުން ބޭރުކުރުމަކީ އިސްރާއީލުން ޒަމާނުއްސުރެ ހިންގަމުން އަންނަ ލާއިންސާނީ އުކުޅެކެވެ.
