ސައުދީ އަރަބިއްޔާގެ މަދީނަތުލް މުނައްވަރާގައި، މަސްޖިދުއްނަބަވީއަށް ކަރަންޓު ފޯރުކޮށްދޭ ކަރަންޓު ޑިބްރިބިއުޝަން ސްޓޭޝަނަކަށް ހޫތީން ޑްރޯން ހަމަލާއެއް ދީފިއެވެ.
ސައުދީ-ލެޑް ކޯލިޝަންގެ ތަރުޖަމާނު މޭޖަރ ޖެނެރަލް ތުރުކީ އަލް-މާލިކީ ވިދާޅުވި ގޮތުގައި، މި ހަމަލާ އަމާޒުކޮށްފައިވަނީ ސެޕްޓެމްބަރު 29 ވަނަ ދުވަހުގެ ފަތިހު 5:11 ގައި "ތައިބާ" ކަރަންޓު ޑިބްރިބިއުޝަން ސްޓޭޝަނަށެވެ. ހަމަލާއަށްފަހު އެ ސަރަހައްދުން ފެނުނު ޑްރޯންގެ ބައިތަކާއި ހިންގުނު އޮޕަރޭޝަނަލް އެސެސްމަންޓުތަކުން މި ހަމަލާ ރާވައި ހިންގާފައިވަނީ ހޫތީންކަން ޔަގީންކުރެވިފައިވާ ކަމަށް އޭނާ ވިދާޅުވިއެވެ.
މި ހަމަލާގެ ސަބަބުން ކަރަންޓު ޓްރާންސްފޯމަރެއްގެ ހިދުމަތް މެދުކެނޑުނު ނަމަވެސް، މުޅި ކަރަންޓު ނެޓްވޯކަށް ބޮޑު އަސަރެއް ކޮށްފައިނުވާ ކަމަށް ކޯލިޝަނުން ހާމަކޮށްފައިވެއެވެ.
Advertisement
އަލް-މާލިކީ ވިދާޅުވީ މިއީ މައްކާއާއި މަދީނާގެ މަދަނީ އުމްރާނީ ވަސީލަތްތަކަށް އަމާޒުކޮށް ހޫތީން މެދުނުކެނޑި ދެމުންދާ ހަމަލާތަކުގެ ތެރެއިން ހަމަލާއެއް ކަމަށެވެ. އަދި ދެ ހަރަމްފުޅާއި އެ ތަންތަނަށް ޒިޔާރަތްކުރާ މީހުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އަޅަންޖެހޭ ހުރިހާ ފިޔަވަޅުތަކެއް ކޯލިޝަނުން އަޅަމުންގެންދާނެކަމަށް ވެސް އޭނާ ވިދާޅުވިއެވެ.
