ޔަމަނުގެ ތަޢިއްޒު ސިޓީގެ އެންމެ މުހިންމު އަދި ނާޒުކު ފްރަންޓްލައިން ކަމަށްވާ އިރުމަތީ "އަލް-ހައުބާން" ޒޯނުގެ އެތެރެއަށް ޔަމަނުގެ ސަރުކާރު ސިފައިންނާއި ޔޫއޭއީގެ "ޖަޔަންޓް ބްރިގޭޑްސް" ގެ ބަރު ލަޝްކަރުތައް ރަސްމީކޮށް ވަދެއްޖެއެވެ. ޔަމަނު ސަރުކާރުގެ އަސްކަރީ ކޮމާންޑުން ނެރުނު ރަސްމީ ބަޔާނެއްގައި ބުނީ، ސައުދީ ކޯލިޝަނުގެ ވަރުގަދަ ވައިގެ އެހީތެރިކަމާއެކު އަލް-ހައުބާންގެ އެންމެ މައި އިންޑަސްޓްރިއަލް ޒޯނާ ހަމައަށް އެމީހުން ވަދެފައިވާ ކަމަށާއި، އެ ސަރަހައްދުގައި ތިބި ޙޫޘީންގެ ދިފާޢުތައް ބަލިކުރަމުންދާ ކަމަށެވެ.
ނަމަވެސް، ޙޫޘީ (އަންޞާރުﷲ) ޖަމާއަތުގެ އަސްކަރީ ތަރުޖަމާނުން ބުނީ، އަލް-ހައުބާންގެ އެތެރޭގެ ހުރިހާ މަގުތަކެއްގައި ސަރުކާރު ސިފައިންނަށް އަމާޒުކޮށް ނުރައްކާތެރި އަސްކަރީ ދަންތުރަތަކާއި މައިންތައް އަތުރާފައިވާނެ ކަމަށެވެ. ޙޫޘީންގެ ކޮމާންޑުން އިންޒާރުދިން ގޮތުގައި، ސަރުކާރުގެ ފައުޖުތައް އަލް-ހައުބާންގެ އެތެރެއަށް ވަންނަ ވަރަކަށް އެމީހުންނަށް ކުރިމަތިވާނެ އަސްކަރީ އަދި ފުރާނައިގެ ގެއްލުންތައް އެތައް ގުނައެއް ބޮޑުވެގެންދާނެއެވެ. އަދި ސިޓީގެ މި ފްރަންޓްލައިން ދިފާޢުކުރަން އެ ޖަމާއަތުން ފުރިހަމައަށް ތައްޔާރުވެފައިވާ ކަމަށް ޙޫޘީން ބުނެއެވެ.
އަސްކަރީ މަސްރަޙު ދިރާސާކުރާ ބައިނަލްއަގުވާމީ މާހިރުން ފާހަގަކުރާ ގޮތުގައި، އަލް-ހައުބާންގެ އެތެރޭގައި ހިނގަމުންދާ ކުރިމަތިލުންތަކަކީ ތަޢިއްޒުގެ ހަނގުރާމައިގެ މުސްތަގުބަލު ކަނޑައަޅާނެ ކުރިމަތިލުމެވެ.
Advertisement
ސައުދީގެ ބޯޓުތަކުން ދަނީ ޙޫޘީންގެ ހަތިޔާރު ގުދަންތަކަށާއި ތަޢިއްޒުގެ މަގާމުތަކަށް މެދުނުކެނޑި ބޮންއަޅަމުންނެވެ.
