ސައުދީ އަރަބިއްޔާގެ އިރުމަތީގައިވާ އެންމެ މުހިންމު އަދި ސިޔާސީ ގޮތުން ނާޒުކު އެއާޕޯޓެއް ކަމަށްވާ "ކިންގް ފަހްދު އިންޓަރނޭޝަނަލް އެއާޕޯޓް"ގެ ވައިގެ ދަތުރުފަތުރުގެ ނިޒާމަށް މެދުނުކެނޑި ބޮޑެތި ބުރޫތަކެއް އަރަމުންދާ ކަމަށާއި، އެއާޕޯޓުގެ އޮޕަރޭޝަންތައް ތަކުރާރުކޮށް ހުއްޓެމުންދާ ކަމަށް ބައިނަލްއަގުވާމީ ވައިގެ ދަތުރުތައް ލައިވްކޮށް ބަލާ "ފްލައިޓް ރާޑަރު" ގެ ރަސްމީ ބަޔާންތަކާ ޙަވާލާދީ ޙޫޘީން (އަންޞާރުﷲ) އިން އިޢުލާންކޮށްފިއެވެ.
ޙޫޘީންގެ އަސްކަރީ މަސްދަރުތަކުން ބުނާ ގޮތުގައި، މި ބުރޫތައް ކުރިމަތިވެފައިވަނީ ސައުދީން ޞަންޢާއަށް އަޅަމުންދާ ބޮންތަކުގެ ބަދަލުހިފުމަށް ޙޫޘީން ފޮނުވާލި ދުރުރާސްތާ މިސައިލް ނުވަތަ ޑްރޯން ނުރައްކަލުގެ ސަބަބުން، އެއާޕޯޓުގެ ރޭޑިއަސް ބަންދުކުރަން ސައުދީއަށް މަޖުބޫރުވުމުންނެވެ.
ނަމަވެސް، ސައުދީ އަރަބިއްޔާގެ ސިވިލް އޭވިއޭޝަނުގެ ރަސްމީ ޗެނަލްތަކުން މި ވާހަކަތަކަށް ރައްދުދެމުން ބުނީ، ދައްމާމް އެއާޕޯޓުގެ ވައިގެ ސަރަހައްދަށް ބުރޫއަރައި ފްލައިޓްތައް ހޯލްޑް ކުރަން ނުވަތަ އެހެން ސަރަހައްދުތަކަށް ޑައިވާޓް ކުރަން ޖެހުނީ އެއާޕޯޓުގެ މައި ރާޑަރު ނިޒާމަށް ދިމާވި ޓެކްނިކަލް މައްސަލައަކާ ގުޅިގެން ކަމަށެވެ. ސައުދީން ބުނާ ގޮތުގައި އެއާޕޯޓަށް ޙޫޘީންގެ އެއްވެސް މިސައިލް ހަމަލާއެއް ސީދާ އަމާޒުވެފައެއް ނުވެއެވެ. ނަމަވެސް، ފަސިންޖަރުންގެ ސަލާމަތްތެރިކަމަށްޓަކައި އެއާޕޯޓަށް އަންނަން އޮތް ބައެއް ބައިނަލްއަގުވާމީ ފްލައިޓްތައް ކުޑަ ވަގުތުކޮޅަކަށް މަޑުޖައްސާލަން ޖެހުނު ކަމަށް ސައުދީން އެއްބަސްވެއެވެ.
Advertisement
އަސްކަރީ މަސްރަޙު ދިރާސާކުރާ ބައިނަލްއަގުވާމީ މާހިރުން ފާހަގަކުރާ ގޮތުގައި، ޙޫޘީން ފާއިތުވި 48 ގަޑިއިރު ތެރޭގައި ރިޔާޟް، ޔަންބުޢު އަދި ނަޖްރާން އެއާޕޯޓަށް ޖެހިޖެހިގެން ހަމަލާތައް ދީފައިވުމުން، ދައްމާމް އެއާޕޯޓުގައި މިފަދަ ބޮޑު "ފްލައިޓް ޑިސްރަޕްޝަނެއް" ހިނގުމަކީ ސައުދީގެ ވައިގެ ދިފާޢީ ބާރުތަކަށް ނަފްސާނީ ގޮތުން ބޮޑު ޕްރެޝަރެއް ކުރިމަތިވެފައިވާ ކަމުގެ ހެކިތަކެކެވެ.
