ޔަމަނުގެ ދެކުނުގައި އޮންނަ ޝަބްވާ ޕްރޮވިންސްގައި ސަރުކާރަށް ތާއީދުކުރާ ފައުޖުތަކުގެ އަސްކަރީ މަރުކަޒަކަށް ހޫޘީ ހަނގުރާމަވެރިން ދިން ބާރުގަދަ ބެލިސްޓިކް މިސައިލް ހަމަލާއެއްގައި، އަލަށް އަސްކަރިއްޔާއާ ގުޅުނު 58 ސިފައިން މަރުވެއްޖެއެވެ.
މި ހާދިސާ ހިނގާފައި ވަނީ ޝަބްވާ ޕްރޮވިންސްގެ އަސްކަރީ ތަމްރީނުދޭ މަރުކަޒެއްގައި ސިފައިންގެ އައު ބެޗެއްގެ ތަމްރީނުތައް ކުރިއަށްދަނިކޮށެވެ. މީޑިއާ ރިޕޯޓްތައް ބުނާގޮތުގައި، ހޫޘީން ފޮނުވާލި މިސައިލް އަމާޒުވެފައި ވަނީ ސިފައިން ހެނދުނުގެ ކަސްރަތާއި ތަމްރީނުތަކަށް އެއްވެ ތިބި މައިދާނަށެވެ.
މި ހަމަލާގައި 58 މީހުން މަރުވުމުގެ އިތުރުން، އެތައް ބަޔަކު ވަރަށް ބޮޑަށް ޒަޚަމްވެފައިވާ ކަމަށް ޞިއްޙީ އޮފިޝަލުންނާ ޙަވާލާދީ ޚަބަރުތައް ބުނެއެވެ. ޒަޚަމްވި މީހުންގެ ތެރޭގައި ހާލު ސީރިއަސް މީހުން ގިނަވުމުން، މަރުވި މީހުންގެ އަދަދު އިތުރުވުމަކީ އެކަށީގެންވާ ކަމެކެވެ.
Advertisement
މި ހަމަލާއަކީ ޝަބްވާ ސަރަޙައްދުގެ ކޮންޓްރޯލް ހޯދުމަށާއި، ޔަމަނުގެ ސަރުކާރުގެ ބާރުތައް ބަލިކަށިކޮށްލުމުގެ މަޤްޞަދުގައި ހޫޘީން ދިން އަމާޒު ހަމަލާއެއް ކަމަށް އަސްކަރީ މަސްދަރުތަކުން ބުނެއެވެ. ޝަބްވާއަކީ ތެލުގެ މުއްސަނދިކަން ލިބިފައިވާ މުހިންމު ސަރަޙައްދަކަށް ވާތީ، އެ ސަރަޙައްދުގެ ކޮންޓްރޯލް ހޯދުމަށް ދެފަރާތުގެ ދެމެދުގައި ކުރިމަތިލުންތައް އަންނަނީ އިތުރުވަމުންނެވެ.
ޔަމަނުގައި ދާޚިލީ ހަނގުރާމަ ފެށުނު ފަހުން އެ ޤައުމުގެ އެކި ސަރަޙައްދުތަކުގައި ހަމަނުޖެހުންތައް ހިނގަމުންދާއިރު، މިފަދަ ނުރައްކާތެރި ހަމަލާތަކުގެ ސަބަބުން ސަރަޙައްދީ ޞުލްޙައަށް ކުރެވެމުންދާ މަސައްކަތްތަކަށް ވަނީ ބޮޑެތި ހުރަސްތަކެއް އެޅިފައެވެ.
