ހާސްކަމާއި ނަފުސާނީ އެކި ގޮންޖެހުންތަކުން ފުރިފައިވާ މިފަދަ ޒަމާނެއްގައި، ދިރިއުޅުމުގެ ދަތިތަކާއި ފިކުރުތަކުން އަރައިގަތުމަށް އޮތް އެންމެ މަތިވެރި އަދި އެންމެ ފުރިހަމަ ފަރުވާއަކީ ގިނަގިނައިން މާތް ﷲ ހަނދުމަކުރުން ކަމަށް މިއަދުގެ ހުކުރު ހުތުބާގައި ވިދާޅުވެއްޖެއެވެ.
ހުތުބާގައި ފާހަގަކުރެއްވި ގޮތުގައި، މާތް ﷲ ހަނދުމަކުރުމަކީ ހިތްތަކުގެ ދިރުމެކެވެ. އަދި އެއީ އެކަލާނގެ މަތިވެރި ހަޟްރަތާ ކުއްތަންވުމަށް އޮތް އެންމެ ފަސޭހަ އަދި އެންމެ ކުރު މަގެވެ. ޛިކުރުކުރުމުގެ ސަބަބުން އިންސާނާގެ ނަފުސަށް ހަމަޖެހުމާއި އުފާވެރިކަން ލިބި، ދިރިއުޅުމުގެ ހާސްކަމާއި ބުރަކަން ފިލުވައިދެއެވެ.
މާތް ﷲ ހަނދުމަކުރުމަކީ މައިގަނޑު ތިން ބަޔަކަށް ބެހިގެންވާ ކަމެއް ކަމަށް ހުތުބާގައި ބަޔާންކުރެއްވިއެވެ. ފުރަތަމަ ކަމަކީ ހިތުގެ އިހްލާސްތެރިކަމާއެކު ހަނދުމަކުރުމެވެ. މިއީ މާތް ﷲގެ ކުޅަދުންވަންތަކަމާއި ކައުނުގައިވާ އުފެއްދުންތަކާ މެދު ފުންކޮށް ފިކުރުހިންގުމާއި، އެކަލާނގެއަށް ބިރުވެތިވުމާއި ލޯބިވުން ހިތުގައި ވަރުގަދަކުރުމެވެ. ދެވަނަ ކަމަކީ ދުލުން ޛިކުރުކުރުމެވެ. އެއީ މާތް ﷲގެ މަތިވެރިކަން ބަޔާންކޮށް، ހަމްދާއި ޘަނާ ކިޔުމާއި، ކީރިތި ގުރުއާން ކިޔެވުމާއި، ތަސްބީހަކިޔުމާއި، ކީރިތި ރަސޫލާ ﷺ ގެ މައްޗަށް ސަލަވާތްކިޔެވުމެވެ. ތިންވަނަ ކަމަކީ އަމަލީ ގޮތުން ނުވަތަ ގުނަވަންތަކުގެ ޒަރީއާއިން މާތް ﷲ ހަނދުމަކުރުމެވެ. އޭގެ ތެރޭގައި ފަރުޟު ފަސް ނަމާދުކުރުމާއި، ރޯދަހިފުމާއި، ޒަކާތާއި ހައްޖުގެ އަޅުކަން ފުރިހަމަކުރުމުގެ އިތުރުން މައިންބަފައިންނަށް އޯގާތެރިވެ މީސްތަކުންނަށް ހެޔޮ ފޯރުވުން ހިމެނެއެވެ.
Advertisement
މީގެއިތުރުން، ޛިކުރުކުރުމަކީ ހަމައެކަނި މިސްކިތުގައި އިނދެގެން ކުރާ ކަމެއް ނޫން ކަމަށް ހުތުބާގައި ފާހަގަކުރެއްވިއެވެ. އެގޮތުން ހިނގާފައި ދާއިރު، ސަވާރީތަކުގައި ދަތުރުކުރާއިރު، އޮށޯވެ އޮންނަ އިރު އަދި މަސައްކަތުގެ މައިދާނުގައި އުޅޭއިރުވެސް މާތް ﷲއަށް ޛިކުރުކުރުންމަތީ ދެމިތިބުމަށް ނަސޭހަތްތެރިވެފައިވެއެވެ. އަދި ކީރިތި ރަސޫލާ ﷺ ޙަދީޘްކުރައްވާފައިވާ ފަދައިން، ޛިކުރުކުރާ މީހާ އާއި ޛިކުރުނުކުރާ މީހާގެ މިސާލަކީ، ދިރިހުރި މީހަކާއި މަރުވެފައިވާ މީހެއްގެ މިސާލުކަން ވެސް ހުތުބާގައި ވަރަށް ތަފުސީލުކޮށް ބަޔާންކުރެއްވިއެވެ.
ހުތުބާ ނިންމަވާލައްވަމުން ވަނީ ރާއްޖެއަށް ތިޔާގިކަމާއި ފާގަތިކަން މިންވަރުކޮށްދެއްވުމަށާއި، މަސްވެރިކަމާއި ދަނޑުވެރިކަމުގައި ބަރަކާތްލެއްވުމަށް އެދިފައެވެ. އަދި ބަލިމީހުންނަށް ޝިފާދެއްވައި، ދަރަނިވެރިންގެ ދަރަނިތައް ފިއްލަވައިދެއްވައި ތަނަވަސްކަން އިތުރުކޮށްދެއްވުން އެދި ދުއާ ދަންނަވާފައިވެއެވެ.
