އުފަންވާ ކުދިންގެ އަދަދު ރެކޯޑް މިންވަރަކަށް ދަށްވަމުންދާތީ، ސިންގަޕޫރު ސަރުކާރުން އެ ގައުމުގެ ޕަބްލިކް ސެކްޓަރ މުވައްޒަފުންނަށް އަމާޒުކޮށްގެން ސަރުކާރުގެ އެހީތެރިކަމާއެކު މެޗްމޭކިންގ ހިދުމަތެއް ތައާރަފްކޮށްފިއެވެ.
"ފަސްޓްޑޭޓް" ގެ ނަމުގައި ފެށި މި ޕައިލެޓް ޕްރޮގްރާމަކީ އުމުރުން 21 އަހަރާއި 35 އަހަރާއި ދެމެދުގެ ސަރުކާރު މުވައްޒަފުންނަށް ހާއްސަ ޕްރޮގްރާމެކެވެ. ބައިވެރިން މި ހިދުމަތުގައި ރަޖިސްޓަރީވުމަށް ބޭނުންކުރަނީ ސިންގަޕޫރުގެ ގައުމީ ޑިޖިޓަލް އައިޑެންޓިޓީ ނިޒާމެވެ. އަދި އެ މީހުން ޝައުގުވެރިކަން ހުންނަ ކަންކަމާއި، އާދަތަކާއި، އަހުލާގީ މިންގަނޑުތަކާ ގުޅޭގޮތުން ތައްޔާރުކޮށްފައިވާ ސުވާލުތަކަކަށް ޖަވާބުދޭންޖެހެއެވެ.
މި ހިދުމަތުގައި ބޭނުންކުރަނީ ނޯބެލް ޕްރައިޒް ލިބިފައިވާ "ގޭލް-ޝޭޕްލީ ސްޓޭބަލް މެރިއޭޖް އެލްގޮރިދަމް" ނަމަކަށް ކިޔާ ނިޒާމެކެވެ. މިއީ މީހުންގެ ޝަހުސީ ބޭނުންތަކާއި އެދުންތަކަށް ބިނާކޮށް އެކަށީގެންވާ ބައިވެރިން މެޗްކޮށްދޭ ނިޒާމެކެވެ. އާންމު ޑޭޓިންގ އެޕްތަކާ ހިލާފަށް، މި ސަރވިސްއިން އެއްފަހަރާ ގިނަ ޕްރޮފައިލްތައް ދައްކާލުމުގެ ބަދަލުގައި ބައިވެރިންނަށް ފެންނާނީ އެއްފަހަރާ އެންމެ ބައިވެރިއެއްގެ މައުލޫމާތެވެ.
Advertisement
މިކަމާ ގުޅިގެން ސިންގަޕޫރުގެ ރައްޔިތުންގެ މެދުގައި ތަފާތު ހިޔާލުތައް ވަނީ އުފެދިފައެވެ. ބައެއް މީހުން ރަނގަޅު ބައިވެރިއަކާ ބައްދަލުވުމުގެ ފުރުސަތު ލިބުމުން މަރުހަބާ ކިޔާފައިވާއިރު، އަނެއްބައި މީހުން ވަނީ ސަރުކާރުން ހިންގާ މި ޕްރޮގްރާމަކީ ވަރަށް ހަނި އަދި ޝަރުތުތައް މާގިނަ ޕްރޮގްރާމެއް ކަމަށް ބުނެ ފާޑުކިޔާފައެވެ.
މި ޕްރޮގްރާމް ތައާރަފްކޮށްފައިމިވަނީ، 2025 ވަނަ އަހަރު ސިންގަޕޫރުގައި އުފަންވި ކުދިންގެ އަދަދު 30,000 އަށްވުރެ ދަށްވެފައިވާ ދަނޑިވަޅެއްގައެވެ. މިއީ ފާއިތުވި ހަ އަހަރު ދުވަހުގެ ތެރޭގައި މި އަދަދު މިހާ މަދުވި ފުރަތަމަ ފަހަރެވެ. އާއިލާތައް ބިނާކުރުމަށް ހިތްވަރުދިނުމުގެ ގޮތުން ސަރުކާރުން ވަނީ ކުއްޖަކަށް 17 އަހަރު ފުރުމާ ހަމައަށް 70,000 ސިންގަޕޫރު ޑޮލަރުގެ މާލީ އެހީތެރިކަން ދިނުން ފަދަ އެކި ކަންކަން ތައާރަފްކޮށްފައެވެ.
މީގެ ކުރިންވެސް ސިންގަޕޫރުން ވަނީ ސަރުކާރުގެ އެހީތެރިކަމާއެކު މިފަދަ ޕްރޮގްރާމްތައް ހިންގާފައެވެ. އެގޮތުން، 1984 ވަނަ އަހަރު ޔުނިވަރސިޓީ ނިންމާފައިވާ ކައިވެނިނުކޮށް ތިބި މީހުންގެ މެދުގައި ކައިވެންޏަށް ހިތްވަރުދިނުމަށް "ސޯޝަލް ޑިވެލޮޕްމަންޓް ޔުނިޓް" ވަނީ ގާއިމުކޮށްފައެވެ.
އުފަންވާ ކުދިންގެ ނިސްބަތް ދަށްވަމުންދާ މައްސަލަ ހައްލުކުރުމަށް ޓެކްނޮލޮޖީގެ އެހީ ހޯދަނީ ހަމައެކަނި ސިންގަޕޫރެއް ނޫނެވެ. ޖަޕާނުގެ ޓޯކިޔޯއިންވެސް ވަނީ އެކަނި އުޅޭ ރައްޔިތުންނަށް އެކަށީގެންވާ ބައިވެރިން ހޯދައިދިނުމަށް އެހީތެރވުމުގެ ގޮތުން 2024 ވަނަ އަހަރު އޭއައި ޓެކްނޮލޮޖީ ބޭނުންކުރާ ޑޭޓިންގ އެޕެއް ތައާރަފްކޮށްފައެވެ.
