ބޭންކް އޮފް މޯލްޑިވްސް (ބީއެމްއެލް) ގެ މުވައްޒަފުންގެ ލީޑާޝިޕް ހުނަރުތައް ތަރައްގީކުރުމަށާއި، ފަންނީ ގާބިލުކަން އިތުރުކުރުމަށްޓަކައި ސިންގަޕޯ މެނޭޖްމަންޓް ޔުނިވާސިޓީ (އެސްއެމްޔޫ) އާއެކު އެއްބަސްވުމެއްގައި ސޮއިކޮށްފި އެވެ.

މި އެއްބަސްވުމުގެ މައިގަނޑު މަގުސަދަކީ ދެ މުއައްސަސާގެ ދެމެދުގައި އޮތް ގުޅުން ބަދަހިކޮށް، ބީއެމްއެލްގެ މުވައްޒަފުންނަށް ބޭނުންވާ ޕްރޮފެޝަނަލް އެޑިއުކޭޝަން އަދި ތަމްރީނުތައް ފޯރުކޮށްދިނުމެވެ. މިއާއެކު ބީއެމްއެލް އެކެޑަމީއާއި، އެސްއެމްޔޫގެ ޕްރޮފެޝަނަލް ތަމްރީނަށް ހާއްސަ އެސްއެމްޔޫ އެކެޑަމީއާ ދެމެދު އޮތް ގުޅުން އިތުރަށް ފުޅާވެގެންދާނެއެ ވެ. ބީއެމްއެލް އެކެޑަމީއަކީ ބޭންކުގެ މުވައްޒަފުންގެ ތައުލީމީ އަދި ފަންނީ ކުރިއެރުމަށް ހާއްސަކޮށްގެން އުފައްދާފައިވާ ތަނެކެވެ.

މި ގުޅުމުގެ ދަށުން، ބޭންކުގެ މުވައްޒަފުންނަށް ބޭނުންވާ ހާއްސަ ތަމްރީނު ޕްރޮގްރާމްތައް ފަރުމާކުރުމާއި ހިންގުމުގައި އެސްއެމްޔޫއިން އެހީތެރިކަން ފޯރުކޮށްދޭނެ އެވެ. އަދި ހަމަޖެހިފައިވާ އުސޫލެއްގެ ދަށުން މައުލޫމާތާއި ހުނަރު ބަދަލުކުރުމުގެ ފުރުސަތު ލިބި، ބޭންކުގެ މުވައްޒަފުންގެ ފަންނީ ގާބިލުކަން އިތުރުވެ، ފެންވަރު ރަނގަޅު ތަމްރީނުތައް މެދުނުކެނޑި ލިބޭނެ މަގު ފަހިވެގެންދާނެ އެވެ.

މި އެއްބަސްވުމާ ގުޅޭގޮތުން ބޭންކް އޮފް މޯލްޑިވްސްގެ ސީއީއޯ އަދި މެނޭޖިންގ ޑައިރެކްޓަރު މުހައްމަދު ޝަރީފް ވިދާޅުވީ، މި ޕާޓްނާޝިޕުން ރަނގަޅު ލީޑަރުން ބިނާކުރުމަށާއި ބޭންކުގެ ހުރިހާ ދާއިރާއެއްގެ ފަންނީ ގާބިލުކަން އިތުރުކުރުމަށް ކުރަމުންދާ މަސައްކަތް ހާމަވެގެންދާ ކަމަށެވެ.

"ދިވެހިރާއްޖޭގެ އެންމެ ބޮޑު މާލީ އިދާރާގެ ހައިސިއްޔަތުން، އިގްތިސާދު ބައްޓަންކުރުމުގައި އަޅުގަނޑުމެން މުހިންމު ދައުރެއް އަދާކުރަން. ބީއެމްއެލް އެކެޑަމީ މެދުވެރިކޮށް، އަޅުގަނޑުމެން މި ބިނާކުރަނީ ބައިނަލްއަގުވާމީ މިންގަނޑުތަކަށް ފެތޭ، ސްޓްރަކްޗާޑް ތައުލީމީ ޕްރޮގްރާމްތަކެއް. މިއާއެކު އަޅުގަނޑުމެންގެ އިގްތިސާދުގެ ލީޑަރުންގެ ގޮތުގައި މުސްތަގުބަލުގައި ތިބޭނެ ފަރާތްތައް ބާރުވެރިކުރެވިގެން މި ދަނީ،" ޝަރީފް ވިދާޅުވި އެވެ.

ވޭތުވެދިޔަ އަހަރުވެސް އެސްއެމްޔޫއާއެކު ބީއެމްއެލްއިން ވަނީ ކާމިޔާބު މަސައްކަތްތަކެއް ކޮށްފަ އެވެ. އެގޮތުން ބޭންކުގެ 40 މުވައްޒަފަކު ވަނީ ލީޑާޝިޕް ޕްރޮގްރާމްތައް ފުރިހަމަކޮށްފަ އެވެ. މީގެ ތެރެއިން ސީނިއާ 20 މުވައްޒަފަކު 'އެގްޒެކެޓިވް ސެޓިފިކެޓް އިން ލީޑާޝިޕް އެންޑް ޕީޕަލް މެނޭޖްމަންޓް' ހާސިލުކޮށްފައިވާއިރު، އަނެއް 20 މުވައްޒަފުން ވަނީ 'ސެޓިފިކެޓް އިން ލީޑަރޝިޕް އެންޑް ޕީޕަލް މެނޭޖްމަންޓް' ހާސިލުކޮށްފަ އެވެ.

ބީއެމްއެލްއިން އަންނަނީ މުވައްޒަފުން ތަރައްގީކުރުމަށާއި ބޭންކިންގ ހިދުމަތުގެ ފެންވަރު މަތިކުރުމަށް ގިނަ އިންވެސްޓްމަންޓްތަކެއް ކުރަމުންނެވެ. މި އައު އެއްބަސްވުމަކީ ބޭންކުން ފޯރުކޮށްދޭ ހިދުމަތްތައް އިތުރަށް ހަރުދަނާކޮށް، މުވައްޒަފުންނަށް ކުރިއަށް ދިއުމުގެ މަގު ފަހިކޮށްދިނުމަށް އެޅުނު މުހިންމު ފިޔަވަޅެކެވެ.