މެދުއިރުމަތީގެ މަޝްރަހަށް އަންނަމުންދާ ބަދަލުތަކާ ގުޅިގެން ރާއްޖެއަށް ކުރާނެ އަސަރުތައް ކުޑަކުރުމަށްޓަކައި، ދުނިޔޭގެ އިތުރު މާކެޓްތަކުން ތެޔޮ ގެނައުމުގެ މަސައްކަތް ސަރުކާރުން ފަށާފައިވާ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
އީރާނާއި، އިސްރާއީލް އަދި އެމެރިކާ ހިމެނޭ ހަނގުރާމައިގެ ސަބަބުން ކުރިމަތިވެދާނެ އިގްތިސާދީ ލޮޅުންތައް ބެލުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަންކުރެއްވި ކެބިނެޓް ކޮމިޓީން ބޭއްވި ދެވަނަ ނޫސްވެރިންގެ ބައްދަލުވުމުގައި ވާހަކަދައްކަވަމުން، މިނިސްޓަރު ޒަމީރު ވިދާޅުވީ އިތުރު މާކެޓްތަކުން ތެލުގެ ބާވަތްތައް ރާއްޖެއަށް ގެނައުމަށް ފެށި މަސައްކަތް ވަރަށް ކާމިޔާބުކަމާއެކު ކުރިއަށްދާ ކަމަށެވެ.
އެގޮތުން، މިހާރު މެލޭޝިއާ އަދި ސިންގަޕޫރުން ތެޔޮ ގެނައުމުގެ އިންތިޒާމުތައް ހަމަޖައްސާފައިވާކަން މިނިސްޓަރު ފާހަގަކުރެއްވިއެވެ. މިނިސްޓަރު ވިދާޅުވި ގޮތުގައި، ސިންގަޕޫރުން ގެންނަ ޕެޓްރޯލާއި ޑީސަލްގެ ފުރަތަމަ ޝިޕްމަންޓް އަންނަ މަހުގެ ކުރީކޮޅު ރާއްޖެއަށް ލިބޭނެ އެވެ.
މީގެ އިތުރުން، އަރަބި ގައުމުތަކާއެކު ރާއްޖެއިން ބާއްވަމުންދާ ގާތް ގުޅުމުގެ ސަބަބުން މި ނާޒުކު ދަނޑިވަޅުގައި ވެސް ރަނގަޅު އަގުތަކެއްގައި ތެޔޮ ލިބެމުންދާކަން މިނިސްޓރު ފާހަގަކުރެއްވި އެވެ. އެގޮތުން އޮމާނުން ވެސް ކުރިއަށް އޮތް ތަނުގައި ތެލުގެ އިތުރު ޝިޕްމަންޓެއް ރާއްޖެ އަންނާނެ ކަމަށް މިނިސްޓަރު މައުލޫމާތު ދެއްވި އެވެ.
ދުނިޔޭގެ ބާޒާރުގައި ތެލުގެ އަގަށް ބަދަލުތަކެއް އަންނަމުންދިޔަ ނަމަވެސް، ރާއްޖޭގެ ބާޒާރުގައި ތެލުގެ އަގު ބޮޑުކުރުމުގެ އެއްވެސް ވިސްނުމެއް މިވަގުތު ސަރުކާރުގެ ނެތްކަން މިނިސްޓަރު ކަށަވަރުކޮށްދެއްވި އެވެ. ސަރުކާރުގެ މައިގަނޑު އަމާޒަކީ އެކި މާކެޓްތަކުން ތެޔޮ ހޯދައި، ރައްޔިތުންނަށް އަތްފޯރާފަށުގައި ތެލުގެ ހިދުމަތް މެދުނުކެނޑި ފޯރުކޮށްދިނުން ކަމަށް މިނިސްޓަރު ޒަމީރު ވިދާޅުވި އެވެ.
