އެމެރިކާގެ އަސްކަރީ ބޯޓުތައް ބޭނުންކުރާ އިނގިރޭސިވިލާތުގެ އާރު.އޭ.އެފް ފެއަރފޯޑް މަރުކަޒަށް އަމާޒުކޮށް މިދިޔަ ހަފުތާ ބަންދުގައި ދޭން އުޅުނު ނުރައްކާތެރި ޙަމަލާގެ ފަހަތުގައި އީރާނުގެ އަތެއްވާ ކަމުގެ "ވަރުގަދަ ހެކިތަކެއް" އެބަހުރި ކަމަށް އިނގިރޭސިވިލާތުގެ ބޮޑުވަޒީރު އެންޑީ ބާންހަމް ވިދާޅުވެއްޖެއެވެ.
ބީބީސީއަށް ދެއްވި އިންޓަވިއުއެއްގައި ބޮޑުވަޒީރު ވިދާޅުވީ، މި ހާދިސާއާ ގުޅިގެން ކައުންޓަރ ޓެރަރިޒަމް ފުލުހުން ވަރަށް ފުން އަދި ކޮމްޕްލެކްސް ތަޙުޤީޤެއް ކުރިއަށްގެންދާ ކަމަށާއި، މިކަމުގައި އެމެރިކާގެ ކަމާބެހޭ ފަރާތްތަކާ ގާތުން މަސައްކަތް ކުރަމުންދާ ކަމަށެވެ.
Advertisement
މި ހާދިސާ ހިނގާފައިވަނީ މިދިޔަ ހަފްތާގެ އާދިއްތަ ދުވަހުގެ ހެނދުނުގެ ވަގުތެއްގައި، އެ އަސްކަރީ މަރުކަޒު ކައިރިން ތުހުމަތުކުރެވޭ ވެހިކަލްތަކެއް ފެނިގެން ކައުންޓަރ ޓެރަރިޒަމް ފުލުހުން ހިންގި ބޮޑު އޮޕަރޭޝަނެއްގައި ކަމަށް އިނގިރޭސީވިލާތުން ބުނެއެވެ. މި އޮޕަރޭޝަނުގައި ޓެރަރިޒަމްގެ ކުށުގެ ތުހުމަތާއި ގޮވާތަކެތި ގެންގުޅުނު ކަމުގެ ތުހުމަތުގައި ލަންޑަނަށް ނިސްބަތްވާ ޒުވާން ފަސް ފިރިހެނުން ހައްޔަރުކުރިއެވެ.
އިނގިރޭސި ބޮޑުވަޒީރުގެ މި ބޮޑު ތުހުމަތުތަކާ ގުޅިގެން ލަންޑަނުގައި ހުންނަ އީރާނުގެ އެމްބަސީން ވަނީ ވަރަށް ހަރުކަށި ބަޔާނެއް ނެރެ، އެ ތުހުމަތުތައް މުޅިން ދޮގުކޮށްފައެވެ. އީރާނުން ބުނިގޮތުގައި މިއީ އެއްވެސް އަސާސެއް ނެތް، އަދި ސާބިތުނުހިފޭ ދޮގު ވާހަކަތަކެކެވެ. އަދި އިނގިރޭސި މީޑިއާތަކާއި ސަރުކާރުން މިފަދަ ދޮގު ތުހުމަތުތައް ކުރަނީ އިނގިރޭސިވިލާތުގެ ރައްޔިތުންގެ ހިތްތަކުގައި އީރާނާ މެދު ނަފުރަތާއި ބިރުވެރިކަން އުފެއްދުމުގެ ނުބައި މަޤްޞަދުގައި ކަމަށްވެސް އީރާނުގެ ބަޔާނުގައި ބުނެފައި ވެއެވެ.
