އިސްރާއީލުގެ އަނިޔާވެރި ސިފައިން ޣައްޒާގެ އެކި ސަރަޙައްދުތަކަށް ދިން ވައިގެ ވަރުގަދަ ހަމަލާތަކެއްގައި ފަލަސްތީނުގެ ނޫސްވެރިއަކު ހިމެނޭހެން މަދުވެގެން 8 މީހުން ޝަހީދުވެ، އެތައް ބަޔަކު ޒަޚަމްވެއްޖެއެވެ.
މި ހަމަލާތައް އަމާޒުކޮށްފައިވަނީ ޣައްޒާގެ މެދުތެރޭގައިވާ ޢާންމުން ދިރިއުޅޭ ސަރަޙައްދުތަކަށާއި، ގެދޮރު ގެއްލިފައިވާ މީހުން ހިޔާވަހިކަން ހޯދަމުންދިޔަ މަރުކަޒުތަކަށެވެ. މައުލޫމާތު ލިބިފައިވާ ގޮތުގައި މި ހަމަލާގައި ޝަހީދުވި ނޫސްވެރިޔަކީ، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ހިންގަމުންދާ ޖަރީމާތައް ދުނިޔެއަށް ހާމަކުރުމުގައި ހަރަކާތްތެރިވަމުންދިޔަ މީޑިއާގެ މެންބަރެކެވެ.
ފަލަސްތީނުގެ ޞިއްޙަތާ ބެހޭ ވުޒާރާއިން ހާމަކުރި ގޮތުގައި، ހަމަލާ ދިން ސަރަޙައްދުތަކުން މީހުން ސަލާމަތްކުރުމުގެ މަސައްކަތް އަދިވެސް ދަނީ ކުރެވެމުންނެވެ. އަދި ޝަހީދުވި މީހުންގެ ތެރޭގައި ކުށެއްނެތް ކުޑަކުދިންނާއި އަންހެނުން ވެސް ހިމެނޭ ކަމަށް އެ އިދާރާއިން ބުނެފައިވެއެވެ.
Advertisement
އިސްރާއީލުން މިފަދަ ހަމަލާތައް ދެމުން މިގެންދަނީ ހަނގުރާމަ ހުއްޓާލުމާ ގުޅޭގޮތުން ބައިނަލްއަޤްވާމީ ފެންވަރުގައި މަޝްވަރާތައް ހިނގަމުންދާ ދަނޑިވަޅެއްގައެވެ. މިއީ ބައިނަލްއަޤްވާމީ ޤާނޫނުތަކާއި އިންސާނީ ޙައްޤުތަކަށް އެއްވެސް ބެލުމެއްނެތި އިސްރާއީލުން ހިންގަމުންދާ ލާއިންސާނީ ޢަމަލުތަކުގެ ތެރެއިން ހިންގި އިތުރު ޤަތުލުޢާންމެކެވެ.
ނޫސްވެރިންނަށް އަމާޒުކޮށް އިސްރާއީލުން ދެމުންދާ މިފަދަ ހަމަލާތަކުގެ މަޤްޞަދަކީ ޣައްޒާގެ ހަޤީޤީ ހާލަތާއި އެމީހުންގެ ޖަރީމާތައް ދުނިޔެއަށް ފޮރުވުން ކަމަށް ބައިނަލްއަޤްވާމީ މީޑިއާ ޖަމްޢިއްޔާތަކުން ވަނީ ތުހުމަތުކޮށް، މި ހަމަލާ ވަރަށް ބޮޑަށް ކުށްވެރިކޮށްފައެވެ.
