އަމީނީމަގުގައި މަރާމާތުކުރަމުންދާ ސަރަހައްދު، އަންނަ އާދިއްތަ ދުވަހު އާންމު ދަތުރުފަތުރަށް ހުޅުވާލާނެ ކަމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާއިން ހާމަކޮށްފިއެވެ.
މާފަންނާވީ ފަޅީގެ ތާރުގަނޑު ވަރަށް ބޮޑަށް ހަލާކުވެ ވަޅުގަނޑުތައް ހެދި، އުޅަނދުތައް ދުއްވުމަށް ބޮޑެތި ދަތިތަކެއް ކުރިމަތިވުމާ ގުޅިގެން، އެ ސަރަހައްދު އަލުން މަރާމާތުކުރުމުގެ މަސައްކަތް އެމްޓީސީސީއާ ހަވާލުކޮށްފައިވަނީ ޖޫން މަހުގެ 15 ވަނަ ދުވަހުއެވެ. އެ ސަރަހައްދަކީ އާންމު ބަހުގެ ހިދުމަތުގެ އިތުރުން ގިނަ އަދަދަކަށް ބަރު އުޅަނދުތައްވެސް ދުއްވާ މުހިންމު މަގުބައެކެވެ.
މި މަޝްރޫއުގެ ދަށުން މިހާތަނަށް ވަނީ ސެގްމަންޓް 1 އަދި ސެގްމަންޓް 2 ގެ މަސައްކަތްތައް އެއްކޮށް ނިންމާލާފައެވެ. އެގޮތުން ސެގްމަންޓް 1 ގެ ދަށުން ދިވެހިރާއްޖޭގެ އަޑުން ފެށިގެން ދަރުމަވަންތަ ހޮސްޕިޓަލާ ހަމައަށް އަދި ސެގްމަންޓް 2 ގެ ދަށުން އަޑު ކުރިމަތީގެ ހަތަރުއަނގޮޅި ކަންމަތީގައި ވަނީ ތާރުއަޅައި ނިންމާފައެވެ. މި ސަރަހައްދުތަކުގައި ކުރިން އަޅާފައިވާ ތާރުގަނޑު ނަގައި، މަގުގެ އަޑީގައިވާ އެކި ނެޓްވޯކްތައް އަލުން ތަރުތީބުކުރުމުގެ މަސައްކަތްވެސް ވަނީ ފުރިހަމަކޮށްފައެވެ.
Advertisement
ތާރުއެޅުމުގެ މަސައްކަތަށްފަހު، މިހާރު ކުރިއަށްދަނީ މަގުމަތީގެ ނިޝާންތައް ކުރެހުމާއި ފިނިޝިންއާ ގުޅޭ އެންމެ ފަހުގެ މަސައްކަތްތަކެވެ. ބިނާރާ ބެހޭ ވުޒާރާއިން ވިދާޅުވީ، ހުރިހާ މަސައްކަތެއް ނިންމައި އާދިއްތަ ދުވަހު މި ސަރަހައްދު ހުޅުވާލުމަށްފަހު، ދެން ފަށާނީ ސެގްމަންޓް 3 ގެ މަސައްކަތް ކަމަށެވެ. އެ ސެގްމަންޓްގެ ދަށުން މަރާމާތުކުރުމަށް ހަމަޖެހިފައިވަނީ އިއްޒުއްދީން މަގުން ފެށިގެން ކޯރުކެނޑި ހިނގުމާ ހަމައަށް އޮތް ސަރަހައްދެވެ.
މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ ސިޔާސަތުގެ ދަށުން، މާލޭގެ ހުޅަނގު ފަރާތު ބޭރުމަގު ތަރައްގީކުރުމުގެ މަޝްރޫއު ފެށުމަށްވެސް ސަރުކާރުން އަންނަނީ ތައްޔާރުވަމުންނެވެ. އެ މަސައްކަތުގެ ތެރެއިން ފެން ހިންދާ ނިޒާމު ގާއިމުކުރުމަށްޓަކައި ވެސްޓް ޕާކް ސަރަހައްދުން ބައެއް މިހާރު ވަނީ ބަންދުކޮށްފައެވެ.
މީގެއިތުރުން، ބޮޑުތަކުރުފާނު މަގު ތާރުއަޅައިގެން ތަރައްގީކުރުމުގެ މަޝްރޫއުގެ ދަށުން، ހެންވޭރު ފެރީ ޓާމިނަލުން ފެށިގެން ނޯތު ހާބަރާ ހަމައަށް އޮތް ސަރަހައްދުގެ މަސައްކަތް ސަރުކާރުން މިހާރު ވަނީ މުޅިން ނިންމާލާފައެވެ. މިއާއެކު އެ ސަރަހައްދުގެ ޓްރެފިކް ތޮއްޖެހުމަށް ބޮޑު ހައްލެއް ލިބި، ދަތުރުފަތުރުކުރާ ފަރާތްތަކަށް ވަނީ ބޮޑު ލުއިފަސޭހަކަމެއް ލިބިގެން ގޮސްފައެވެ.
