އީރާނުގެ ރައްޔިތުންގެ މެދުގައި ބައިބައިވުން އުފައްދައި، ގައުމުގެ ހަމަޖެހުން ނަގާލުމަށް އެމެރިކާއާއި އިސްރާއީލުން ރާވަމުންދާ ކަމަށް އީރާނުގެ ރައީސް މަސްޢޫދު ޕެޒެޝްކިއާން ވިދާޅުވެއްޖެއެވެ.
އަލްޖަޒީރާއިން ރިޕޯޓްކޮށްފައިވާ ގޮތުގައި، އީރާނުގެ ވެރިރަށް ތެހެރާނުގައި ވާހަކަފުޅު ދައްކަވަމުން ރައީސް ޕެޒެޝްކިއާން ވިދާޅުވީ، ދުޝްމަނުން އަބަދުވެސް މަސައްކަތް ކުރަމުންދަނީ އެ ގައުމުގެ އެތެރޭގެ އެއްބައިވަންތަކަން ނައްތާލުމަށް ކަމަށެވެ. އަދި ޚާއްޞަކޮށް އެމެރިކާއާއި ޒަޔަނިސްޓް އިސްރާއީލުން އިސްނަގައިގެން، އެކި ގޮތްގޮތުން އީރާނުގެ ސިޔާދަތަށް ނުރައްކާކޮށް، ދާޚިލީ ހަމަނުޖެހުންތައް އުފެއްދުމަށް މަސައްކަތް ކުރަމުންދާ ކަމަށް އެމަނިކުފާނު ތުހުމަތު ކުރެއްވިއެވެ.
ރައީސް އިތުރަށް ފާހަގަކުރެއްވި ގޮތުގައި، ބޭރުގެ ބާރުތަކުން އީރާނާ ދެކޮޅަށް ހިންގާ މިފަދަ ހީލަތްތެރި ރޭވުންތަކުގެ މައިގަނޑު ބޭނުމަކީ، އިސްލާމީ އުއްމަތުގެ ކުރިއެރުމާއި އީރާނުގެ ތަރައްޤީއަށް ހުރަސްއެޅުމެވެ. އެހެންކަމުން، މި ދަނޑިވަޅުގައި އީރާނުގެ ހުރިހާ ރައްޔިތުންނާއި ސިޔާސީ ފަރާތްތަކުން ވެސް ގައުމީ މަސްލަހަތު އިސްކޮށް، އެއްބައިވަންތަކަމާއެކު ސާބިތުވެ ތިބުމަށް އެމަނިކުފާނު ވަނީ ގޮވާލައްވާފައެވެ.
Advertisement
މެދުއިރުމަތީގެ މަސްރަޙު ނުހަނު ބޮޑަށް ހޫނުވެފައިވާ މި ދަނޑިވަޅުގައި، އިސްރާއީލުން ފަލަސްތީނާއި މެދުއިރުމަތީގެ އެކި ސަރަޙައްދުތަކަށް ދެމުންދާ ލާއިންސާނީ ހަމަލާތަކާ ގުޅިގެން އީރާނާއި ހުޅަނގުގެ ބާރުތަކާ ދެމެދު އޮތް ގުޅުން ވަނީ ކުރިއަށްވުރެވެސް ބޮޑަށް ގޯސްވެފައެވެ. އީރާނުން ދެކޭގޮތުގައި ސަރަޙައްދީ ހަމަޖެހުމަށް އެންމެ ބޮޑު ނުރައްކަލަކީ އެމެރިކާގެ ވާގިވެރިކަމާއެކު އިސްރާއީލުން ހިންގަމުންދާ ޖަރީމާތަކެވެ.
